Алимент төлемегендерге аяушылық жоқ. Жетісайда борышкерлер біртіндеп ұсталып жатыр. Көлігі барлардың көлігі айыптұраққа қойылып, оған көнгісі келмегендер абақтыда отырып шығады. Борышкерлермен осылай күреспесе, бүлдіршіндерін жәудіретіп аш қалдырып отырғанға ұқсайды.
Жетісайда биыл алимент төлеу бойынша 1995 атқару ісі қозғалған. Онда 2841 балаға 21 млн. теңге өндіру көзделген. Дегенмен қарызын төлеуге асықпайтындар көп. Сондықтан прокуратура, сот орындаушылары мен полицейлер бірігіп рейд жүргізді.
Жалғас АМАНТАЙ, Жетісай аудандық прокуротурасының прокуроры:
«ӘҚБ кодексінің 669-бабы бойынша, әкімшілік жауапкершілік қарастырылып, кодекске сай әкімшілік қамақ және айыппұл көзделген. Бізде практикада қамау жазасын қолданамыз. Бір тәуліктен 5 тәулікке дейін».
Алимент төлеуден жалтарып жүргендер анықталса, автокөліктері айып тұрақтарына қойылды. Онда борышын төлеп болғаннан кейін, айыптұраққа да шығындалады. Сондықтан берешекті уақытында төлеген жөн.
Ерлан БОРТАЕВ, жеке сот орындаушы:
«Борышкерлердің автокөліктері бар ма? Соны анықтап, борышкерлердің автокөліктерін ақылы тұрақжайға қою көзделуде. Алимент берешегін орындамай жүрген 45 борышкерге қатысты іс сот орындаушыларына жолданды. Соның 42-іне қамау жазасы тағайындалған. Қалған 3-іне мемлекет айыппұл тағайындалған».
Құқық қорғау ұйымдары жұмыссыз борышкерлерді еңбекпен қамту жайын да ойластырған. Биыл осындай 67 адам ақылы қоғамдық жұмыстарға тартылды. Ал, қарызды өтеуге шақыратын осындай тексеру жұмыстары алдағы уақытта да тоқтаусыз жалғаса береді.
