Бүгінге дейін әлемде коронавирус індетін жұқтырғандар саны 230 миллионнан асты. Соның 5 млн.ға жуығы көз жұмған. Ал елімізде 962 науқастың жағдайы ауыр. Елдегі және шет елдегі эпидемиологиялық жағдай қалай? Екпе салдыруға тұрғындардың пікірі қандай? Тақырыпты толығырақ тілшіміз тарқатады.
БЛИЦ:
«Бізде вацинасыз жұмысқа ешкімді қабылдамайды. Вакцинам бар, Құдайға шүкір».
«Салдырдық. Өйткені қызметте сондай талап — әр қызметкер екпе алуы керек.
«Вакцина салдырдым. «Спутник-V»
«Білмеймін қайсысы екенін. Салдырдық қой әйтеуір».
Тұрғындар пікірі осындай. Бірі екпені қажеттілік үшін салдырса, енді бірі өзінің қай вакцина түрін алғанын білмейді де.
Жалпы, АҚШ-тың Джонс Хопкинс университетінің мәліметінше, алпауыт АҚШ, Үндістан, Ұлыбритания, Иран, Ресей елдері коронавирус жұқтыру жағдайлары көп тіркелген елдердің қатарына енген. Соңғы онжылдықта денсаулық сақтау саласы бұрын-соңды болмаған ғаламдық дағдарысқа ұшырапты. Бұл туралы БҰҰ Бас Ассамблеясының 76-сессиясына қатысқан Мемлекет басшысы Қасым-Жомарт Тоқаев мәлімдеді.
Қасым-Жомарт Тоқаев, ҚР Президенті
«Өткен жылы Covid-19 дертіне 225 млн адам шалдықты. Медицина қызметкерлеріне, ғалымдар мен вакцина өндірісіне атсалысқан мамандарға алғыс білдіреміз. Пандемияның экономикалық және әлеуметтік зардабы ауыр болды. Әлемде жұмыссыздық жайлап, екі қолға бір күрек таба алмай жүргендердің қатары артып барады. Бүгінде 130 млн. адам кедейлікте өмір сүреді. Пандемия осал тұстарымызды анықтап, халықаралық ынтымақтастықтың маңыздылығын көрсетті».
Бүгінде елімізде 962 адамның жағдайы ауыр. Сондай-ақ 11 мыңнан астам науқас стационарда болса, тағы 54 мың адам ем өз бетінше қабылдауда. Ал Түркістан облысында жағдай тұрақты, өңір — «жасыл» аймақта. Десе де, дәл қазір 48 науқас жансақтау бөлімінде жатса, 25 адам карантинге жіберілген.
Алтын Досанова, Қоғамдық денсаулық сақтау басқарма басшысының орынбасары:
«Жалпы індет басталғалы бері 19 мың 133 бала ауырды, ал соңғы аптада 133 бала тіркелді,. Оның ішінде 74-інде індет нақтыланса, 59-ы расталмады. Бүгінде облыс бойынша 7 науқас ем қабылдауда»
Бір күннің ішінде Қазақстанда 247 адамнан пневмония тіркелсе, 9 өлім дерегі анықталған. Ал, бір қуантарлығы, соңғы тәулікте 4000-ға жуық адам коронавирус індетінен жазылып шыққан.
