Шахмат: Бүгін Қазақстан АҚШ-пен кездесті

Шахматтан дүниежүзілік онлайн Олимпиаданың топтық кезеңі аяқталып, Қазақстан құрамасы «А» тобында бірінші орынға ие болды, – деп хабарлайды Turkistanzaman.kz ақпараттық порталы. Сөйтіп плей-офф кезеңіне шығып, әлемнің ең үздік 8 құрамасының қатарынан табылды.
Отандастарымыз өз тобында Грузияны 4,5:1,5, Индонезияны 3,5:2,5, Румынияны 4:2 есебімен жеңді. Мұнымен тоқтамаған шахматшыларымыз сенсация жасап, азулы Қытайды 3,5:2,5 есебімен бағындырды. Одан кейін Арменияны 3,5:2,5 есебімен жеңсе, Грекияны 5,5:0,5, Австралияны 3,5:2,5 және Моңғолияны 4:2 есебімен жеңді. Отандастарымыз тек Иран құрамасынан ғана 2:4 есебімен жеңілді. Дегенмен ұлттық құрамамыз өз тобында бірінші орынға шығып отыр.
Қазақстан құрамасы сапында Ринат Жұмабаев, Денис Махнев, Рамазан Жалмаханов, Рустам Хуснутдинов, Мұртас Қажғалеев, Қазыбек Нөгербек сынды жігіттер мен Жансая Әбдімәлік, Динара Сәдуақасова, Бибісара Асаубаева, Гүлісхан Нахбаева, Гүлмира Дәулетова және Меруерт Камалиденова өнер көрсетіп жатыр.
Бүгін, яғни, 13 қыркүйекте Нұр-Сұлтан уақытымен сағат 21:30-да Қазақ елінің шахматшылары АҚШ құрамасымен кездеседі. Ақыл-ой өнерін меңгерген зиялы, зерек, ақылды өрендерімізге сәттілік тілейміз. Алға, Қазақстан!