Қыркүйек айында «Антиген» өндірістік кәсіпорны қуаттылығы айына бір миллион дозаға дейін болатын отандық QazVac вакцинасының 300 мың валидациялық сериясын шығарды. Бұл туралы Сovid-19 таратпау жөніндегі ведомствоаралық комиссиясы хабарлады.
Кәсіпорын Биологиялық қауіпсіздік проблемалары ғылыми-зерттеу институтының (БҚПҒЗИ) серіктесі болып табылады. Сонымен қатар оның ішінде отандық QazVac вакцинасын шығарудың толық циклі бойынша екінші өндірістік алаңды әзірлеп, іске қосты.
«Осы мақсатта Алматы облысы әкімдігінің қолдауымен жеңілдетілген несие бойынша вакцина өндіруге арналған жаңа технологиялық жабдықтар сатып алынды. Ағымдағы жылдың қыркүйек айында қуаты айына 1 миллион дозаға дейін жететін «Антиген» алаңында QazVac вакциналарының 300 мың валидациялық сериясы шығарылды», – делінген хабарламада.
Айта кетсек, «Антиген» ҒӨК «OtarBioPharm» ЖШС жанындағы биофармацевтикалық зауытпен қатар БҚПҒЗИ әзірлеген QazVac қазақстандық вакцинасын шығару бойынша екінші өндірістік алаңға айналды.
