Төлебилік кәсіпкер ерекше ағаш өсіруде

Төлеби ауданының тұрғыны павловния ағашын егуді қолға алған. Бағбандықты табыс көзіне айналдырған кәсіпкер 15 сотық жылыжайға мың дана ағаш көшетін отырғызған.
-«Көшетті алдымен стақанда өсіріп алып аламын. Өніп, өскен көшетті жылыжайға отырғызып баптаймын. Көшеттер қазіргі таңда жайқалып, өсіп келеді. Павловния — ауылды көгалдандырып, көркейтуге таптырмайтын ағаш. Көктемде жапырақтары бүршік жармас бұрын 5-6 апта бойы гүлдеп тұрады. Бұл гүлдің басты ерекшелігі — құрт-құмырсқаға бой бермейді. Павловнияның тағы бір ерекшелігі, басқа ағаштарға қарағанда оттегіні бірнеше есеге көп бөледі», – деді жеке кәсіпкер.
Айта кетейік, павловния — жылына 5 метрге дейін өсетін ағаш. Аса ерекше күтімді қажет етпейтін, төзімді өсімдік. Жиһаз дайындауда кеңінен қолданылатын ағашқа сұраныс та өте жоғары.