ҚР еңбек сіңірген әртісі Люция Төлешова өмірден өтті

81 жасқа қараған шағында ҚР еңбек сіңірген әртісі, “Құрмет” орденінің кавалері, профессор, әйгілі педагог, Т. Жүргенов атындағы Қазақ Ұлттық Өнер Академиясының Эстрадалық вокал кафедрасының негізін қалаушы Люция Қажығалиқызы Төлешова өмірден өтті. Қайғылы жағдай туралы академияның бұрынғы ректоры, режиссер Асхат Маемиров өзінің инстаграм парақшасына жазды.
Люция Тулешова 1941 жылы 22 мамырда Астрахан облысында дүниеге келген. 1962 жылы Чайковский атындағы Алматы музыкалық училищесін бітіргеннен кейін Мәскеудегі Гнесиндер музыка академиясына оқуға түседі. Ол Абай атындағы Қазақ академиялық опера және балет театрының солисі болды, онда “Қыз Жібек”, “Ер Тарғын” және т.б. операларда басты рөлдерді сомдады.
Соңғы демі үзілгенше Т.Жүргенов атындағы Қазақ Ұлттық өнер академиясының “Эстрадалық вокал” кафедрасының профессоры болып еңбек еткен Люция Қажығалиқызы Т.Забирова, Б.Шадаева, С.Майғазиев, Б.Мұхитдинова, Ә.Каримов, Қ.Түнтеков, Б.Құлғараев, Б.Ретбаев секілді бірқатар танымал әншілерді өнерге баулыған.
Бүкіл өмірін өнерге арнаған Люция Тулешова коронавирустан қайтыс болды.
«Turkistan Media Holding» ЖШС өнер қайраткерінің отбасы мен жақын туыстарына қайғырып көңіл айтады.