Шымкентте тағы да баспана дауы. 7-20-25 мемлекеттік бағдарламасы арқылы конкурстан өткендер тұрғын үйге қол жеткізе алмай қалуы мүмкін. Өйткені осы мәселеге қатысты шудан кейін министрлік конкурс заңсыз өткізілгенін хабарлап, «7-20-25» бағдарламасы бойынша баспана несиесін рәсімдеуді тоқтатқан. Ал шенеуніктердің кесірінен далада қалдық деген жұрт алғашқы жарнасы төленіп қойған пәтерлерді беруді тоқтатпауды талап етіп отыр.
Бағдарлама негізінде пәтер алу үшін үміткер атанған Арслан Алтай отбасымен бірге пәтер жалдап тұрады. Ол аз пайызбен пәтер алу үшін алғашқы жарнаны төлеген. Керекті құжаттарды тапсырған. Енді конкурстан өтіп, армандаған баспанасын алам дегенде, байқау қорытындысын әділетсіз деп танығанына күйініп отыр.
Арслан Алтаев – Шымкент қаласының тұрғыны:
«Жүгірдік, барынша неғылдық. Енді осы үйді алу керек шығар. Бәрімізде бала-шаға бар. Көшеде жүрмейтін шығармыз енді. Әрқайсымыз квартирада тұрамыз. Шыны керек, бәрі квартирада тұрады. Ай сайын 70-100 мың ақша төлеп, квартираға төлегенше, өзіңнің қалтаңнан шыққан ақшаны өзіңнің кредитіңе төлеген жақсы емес пе?»
Қажетті құжат жинау үшін бармаған жері қалмаған жұрт өздерінің мемлекеттік және бюджеттік мекмеде жұмыс істемейтіндерін айтады. Үй алуға ниеттілер несиелерін жауып, тіпті бар мал-мүліктерін сатқан.
Зере Байырсанова – Шымкент қаалсының тұрғыны:
«Сиырларын да сатып жатыр, машиналарын да сатып жатыр. Енді өзіміз біз тегіннен-тегін алып жатқан жоқпыз. Біз официально 20 процентімізді төлеп, алайын деп жатырмыз бұл үйді».
Жиналғандардың алдына қала әкімінің орынбасары Ерғали Білісбеков шығып жағдайды түсіндірмек болды. Оның айтуынша, «7-20-25» бағдарламасын индустрия және инфрақұрылымдық даму министрлігі жауапты. Қалалық тұрғын үй басқармасы өткізген конкурстан әкімдік бейхабар қалған. Ол тараптардың талап-тілеген ескеріп, тиісті шешім шығару үшін арнайы коммиссия жұмыс жасайтыны айтты.
Ерғали Білісбеков — Шымкент қаласы әкімінің орынбасары:
«Уақыт беріңіздер, сол уақыт бергеннен кейін, талдап болғаннан кейін біз дұрыс шешімге келеміз. Енді оны былай, заңнан бәрін, прокуратураны шақырып алып, отырып, талдап көреміз».
Билік өкілдері тұрғын үй несиесін қаржыландыруда екінші деңгейлі банктердің де қысқарғанын айтады. Енді бар мәселе тек Отбасы банкіне тіреліп тұр.
Байқаудан өткендер мен қалыс қалғандардың жәйін осы арнайы құрылған коммиссия енді жіті қарайтын болады. Ал индустрия және инфрақұрылымдық даму министрлігімен келіспей не қала әкімдігіне хабарламай өз бетінше конкурс өткізген қалалық тұрғын үй басқармасының басшысы Ғалымжан Утенбаев қызметінен уақытша шеттетіліпті. Қазір оның үстінен қылмыстық іс қозғалуы мүмкін.
