Түркістан қаласы 1-мөлтекаудандағы көпқабатты үйде әлі газ жоқ. Құбыр тартылғанымен, көгілдір отынның ауылы алыс секілді. Бұл тұрғын үй әу баста әлеуметтік аз қамтылған 60 отбасына берілген. Бүгінде олар газ балонын тасып жағуға немесе электр пешімен тамақ істеп күнелтуге мәжбүр. Мәселе қашан шешіледі? Тілшіміз Нұрмахан Кенжехан тарқатады.
Жеке меншік емес, мұндағы аз қамтылған азаматтар жалға алушы саналады. Меншік иесі қалалық әкімдік. Сондықтан газ кіргізу жұмыстарын қалалық әкімдік жүргізіп беруі тиіс.
Омарбек Талқаев, №35 А үйдің тұрғыны:
«Тельман Қуанышбеков деген трансгаздың бригадирі ма, білмедім, сол бұрынғы мердігер Абзал деген жігіттен 700 мың теңге ма қарызы бар көрінеді. Абзал оны Тельман деген жігітке өткізген. Ал ол «әлгі қарызды бермей, жұмыс істемеймін», — деп отыр. Ол үшін 13 кран мен 36 метр құбыр алыңдар деді».
Құбырдың талапқа сай келмейтінін айтқан тұрғындар бұл жерде қауіпсіздік мәселесі ескерілмей отыр дейді.
Асанхан Талпақов, №35 А үйдің тұрғыны:
«Бұл жерде құбырлар жіңішке. Ол шайқалады, счетчикті шайқайды. Сосын газ үйге тарайды сосын жарылады».
Бұл үйге газ кіргізу үшін қазынадан 9 млн теңге қаржы бөлінген. Ал тендерді «Қызылорда больт» компаниясы ұтып алған. Дегенмен аталған мекеме өкілі нақты жауап беруден жалтарып отыр. Айтуларынша, жұмысты атқаруды басқа қосалқы мердігерге жүктеген. Бәленің бәрі сол екеуінің арасындағы келіспеушілік кесірінен секілді.
Құрбанбай Мұстапаев, Түркістан қалалық Тұрғын үй қатынастары және тұрғын үй инспекциясы бөлімінің бас маманы:
«Тельман қазір қосып берем деп отыр. Сол, екі мердігердің арасында келіспеушілік болған, соны біз шешу жөнінде жұмыс істеп жатырмыз. Осы аптаның ішінде шешіп те қаламыз, Құдай қаласа».
ТҮЙІН: Осылайша жауапты мамандар барлық мәселені бір аптада шешіп береміз деп отыр. Уәдесінде тұра ма, уақыт көрсетеді. Бұл мәселені біз де бақылауда ұстаймыз.
