Оңтүстіктен – Солтүстікке. Өңірде таңдаған мамандығы бойынша жұмыс істеймін деген адамға 5500 жұмыс орны дайын. Бүгін Түркістанда өткен жұмыс орындары жәрмеңкесінің мақсаты – сол орындарға маман іздеу. Аталған жәрмеңкеде қандай мамандықтар сұранысқа ие? Тілшіміз Әлия Мұқтарқызы тарқатады.
Жылына төрт рет ұйымдастырылатын бұл жәрмеңкені асыға күтетіндер бар. Себебі қалада екі қолға бір күрек таппай жүргендер саны 4000-нан асып жығылады. Солардың бірі – Гүлнұр Мамырханқызы. Бүгінде бала күтіміне байланысты үйде отырған ол десе де жәрмеңкеге келіп, өз бағын сынап көрмекке бел буыпты.
Гүлнұр МАМЫРХАНҚЫЗЫ, қала тұрғыны:
«Осы уақытқа дейін жұмыс істемегенмін. Яғни зейнатақы қорым да жинақталмаған. Жәрмеңе болады дегені естіп, қуанып келдік. Құдай қаласа жұмыс тауып, жұмысқа кіріп кетсем екен»
Бұл жолғы жәрмеңкенің ерекшелігі сол – 1054 бос жұмыс орнының 880-і Солтүстік өңірге жолдама береді. Ал қоныс аударғандарға жұмыс істеуге бар жағдай жасалады. Дәлірек айтқанда, отбасында қанша жан болса, соның әрқайсысына 204 мың теңге көмек беріледі. Сондай-ақ жалға алынған пәтердің де қаражатын үкімет көтереді. Жәрмеңкеде Түркістан қаласынан да бос орындар ұсынылды. Қарқынды құрылыс жүріп жатқан қалаға құрылысшы, архитектор, инженер мамандары тапшы көрінеді.
Талғат ТӨЛЕГЕНОВ, қала әкімінің орынбасары:
«Жәрмеңкенің бір ерекшелігі Солтүстікке де жұмыспен баруға болады. 880 жұмыс беруші 5500 жаңа жұмыс орны ашылды. Қалада жаңадан көп құрылыс жүрігізіліп жатыр. Архитектор, құрылысышлылар, мейрамхана ісін меңгергендер керек»
Шараға 60 кәсіпорын мен мекемеден 112 мамандық бойынша 1054 бос жұмыс орны ұсынылды. Атап айтқанда, тізімде қарапайым жұмысшыдан бастап, шаштараз, кондитер, дәнекерлеуші, жүргізуші, тігінші сынды мамандықтары да бар.
