Түркістан облыстық мемлекеттік сәулет-құрылыс бақылауы басқармасы заң талаптарын сақтамай салынған (салынып жатқан) барлығы – 139 құрылыс нысанын тексеріп, ҚР Әкімшілік құқық бұзушылық туралы Кодексіне сәйкес 206 хаттама толтырған. Салынған 47 892 765 теңге айыппұлдың бүгінде 66 пайызы өндіріліп, 2020 жылмен салыстырғанда көрсеткіш 2,7 есе өсіп отыр. Бұл туралы брифингте 9 айда атқарған жұмыстарын қорытындылаған басқарма басшысының орынбасары Сапарғали Салдаров мәлімдеді.
Айтуынша, басқарма тарапынан 5 мемлекеттік қызмет көрсетіледі. Олар 100% электронды форматта.
«Ағымдағы жылдың III тоқсанның қорытындысы бойынша құрылыс саласында басқарма тарапынан барлығы 749 өтініш қабылданған. Оның ішінде лицензия бойынша 270 өтініш тіркеліп, соның 92-і орындалған. Аттестаттау бойынша тіркелген 479 өтініштің 262-сі өткен. Сәулет, қала құрылысы және құрылыс саласындағы жобаларды басқару жөніндегі ұйымдарды акредиттеу бойынша түскен бір өтініш қанағаттандырылды», – деді Сапарғали Бауыржанұлы.
Түркістан облысында ағымдағы жылдың қаңтар-қыркүйегі аралығында 542 нысанның құрылысы жүргізілуде, оның ішінде 254-і – бюджет қаражаты есебінен, 275-і – жеке кәсіпкерлік қаражаты есебінен, 13-і – инвестициялық қаржы есебінен салынуда.
Құрылыс нысандарын жобалау алдындағы iздестіру, жобалау, құрылыс-монтаждау барысында құрылыс норматив талаптарын бұзғаны үшін екі жобалаушы, 11 мердігер мекемеге ҚР әкімшілік құқық бұзушылық туралы Кодексінің 312-бабымен 100-700 АЕК аралығында айыппұл салынған. Сондай-ақ 10 техникалық қадағалаушы тұлғаға техникалық қадағалау жүргізу құқығына сарапшы аттестатының қолданысын алты ай мерзімге тоқтата тұрып, 180 АЕК мөлшерінде айыппұл төлеткен.
Түркістан облысының Өңірлік коммуникациялар қызметі
