Мұның шешімін Үкімет сағатында цифрлық даму министрі Бағдат Мусин айтты. «Ұялы операторларға салынатын айыппұлды ұлғайтамыз. Сонда ғана ауылдардағы интернет байланыс жақсара түсетін шығар», – деді ол. Әйтпесе, елімізде 5 мыңнан астам елді мекендегі интернет сапасы тым нашар.
Оны жақсарту үшін желі жылдамдығын 3G-ден 4G-ге ауыстыру қажет. Бұл аздай спутниктік трансмиссияны алмастырып, желілерді жаңғырту да керек. Министр шалғайдағы ұялы байланыс операторларына қойылатын талаптарды қатаңдату қажеттігін қадап айтты.
Бағдат Мусин, ҚР Цифрлық даму, инновациялар және аэроғарыш өнеркәсібі министрі:
«Құзыретімізді пайдаланып не істедік? Біз сапа шегін орнаттық. Бұрын ондай болмайтын, операторлар 3G шүріппесінің жанып тұрғанын көрсетсе, тексерушілеріміз «интернет істеп тұр» деп есеп бере беретін. Яғни бір мегабайт тараса болды, демек интернет бар саналатын. Бүгінде біз нақты өлшемдерін бекітіп, 400-ден аса тексеріс жүргізіп, 92 млн теңгеге айыппұл салдық. Депутаттар бұл ретте айыппұл мөлшерін ұлғайтуды сұрады. Біз де мұны қолдадық. Өйткені мобильді операторлардың бәрін қосқанда 92 млн теңге деген түк емес».
