Алғаш рет Ұлыбританияның Кембридж қаласында орналасқан Фицульям музейіне Шығыс Қазақстан облысынан табылған 300 алтын артефакт қыркүйек айында қойылады,-деп хабарлайды TurkistanZaman ақпараттық порталы ҚазАқпаратқа сілтеме жасай отырып.
Бұл жаңалық жайлы бүгін Би-Би-Си және өзге де жетекші сайттар хабарлады.
«Шамамен 2700 жыл бұрын жерленген ежелгі жауынгерлерге тиесілі алтын артефакттар алғаш рет Ұлыбританияда көрсетіледі. Шығыс Қазақстан облысындағы Сақ қорымдарынан алынған қазыналар Кембридждегі Фицуильям музейіне қойылады. Онда зергерлік бұйымдар мен ат әбзелдері және басқа да заттар ұсынылады. Зерттеушілер оларды инвазивті емес технологияларды қолдана отырып зерттейді», деп хабарлады BBC News.
Беделді басылымдардың бірі ретінде саналатын The Times та бұл жаңалықтан құр қалмады. Сайттың хабарлауынша, көпшіліктің көңілін аударатын элемент – жас садақшының жерленген қорымы болады.
Сонымен қатар, күнделікті шығып отыратын Daily Mail газеті, «Гардиан» басылымы көрмеде соңғы жылдары Қазақстанда ашылған ең керемет археологиялық жаңалықтар қойылатындығы жайлы жарыса жазуда.
