Қазақстанда үш жаңа облыс құрылады. Президент Жолдауында көпшілікті қуантқан бастама осы болды. Мемлекет басшысының айтуынша, бұл 1997-і жылдан бергі әкімшілік шекараны жай қалпына келтіру емес. Осы аталған өңірлердің тарихтағы орнын көрсете отырып, мәртебесін арттыру. 1997-і жылы экономикалық ахуалға байланысты облыстарды біріктіру туралы шешім қабылданды. Ал қазір Қазақстан дамудың жаңа сатысына аяқ басты деді Президент
Хакім Абайдың туған жері, Алашорданың астанасы қайта жаңғыратын болды. 25 жыл бұрын Шығыс Қазақстан Облысының құрамына кірген Семей өлкесі енді еншісін алады. Сондай-ақ, бұл өңір қазақтың бас ақынының атымен аталмақ.
Семей жұрты жылдар бойы облыс мәртебесі қайтарылса екен деп тілеп келді. Абай, Шәкәрім, Мұхтарлардың кіндік қаны тамған жердің өңірдегі тек екінші қала болып келгені тұрғындарды қынжылтқан түйткілді мәселе еді.
Сарыарқаның қақ ортасында Ұлытау облысы құрылады. Бұл – бұрынғы Жезқазған облысы. Жошы хан мен Тоқтамыс хан жерленген, аңыз тұлға Алаша ханның кесенесі бой көтерген киелі мекен. Бұл шешім Президенттің айтуынша, қазақ тарихын кеңінен зерттеп, насихаттауға өз серпін береді.
Тағы бір жаңалық – Алматы агломерациясындағы өзгерістер. Жаңа Жетісу облысы құрылып, орталығы Талдықорған болса, Алматы облысының орталығы Қапшағай қаласы болады. Бұл Алматыдан ары орналасқан Қарасай, Жамбыл аудандарының тұрғындары Талдықорғанға сабылмас үшін істеліп отыр. Сондай-ақ, Қапшағай қаласын ұлы тұлға Дінмұхаммед Қонаевтың атымен атауды ұсынса, мұны қолдаймын деді президент
Түркістан өңірінің зиялы қауым өкілдері де мемлекет басшысының бұл шешімін қолдайтындықтарын жеткізді. Президент айтқан себептер, халық аузынан түспей келе жатқанына бірнеше жыл болды дейді Қазақстан жазушылар одағының мүшесі Айдар Сейдәзім.
Мемлекет басшысы 3 облысты құру жоспарын айтпай тұрып, Шымкент қаласы мен Түркістан облысын мысал ретінде келтірді. Күні кеше қабылданған бұл шешім дұрыстығын уақыт өзі көрсетіп отыр.
