Бұдан былай Президенттің туыстары Премьер-министр, министр, облыс, аудан тіпті ауыл әкімі бола алмайды. Сондай-ақ, квазисекторлық қызметте де басшылық лауазымға орналасуына заңды түрде тыйым салынады. Бұл туралы Орталық коммуникациялар қызметінде өткен брифингте әділет министрі Қанат Мусин мәлімдеді. Оның айтуынша, тамыз айына дейін тиісті заң жобалары дайындалып, жыл соңына дейін қабылданады. Министрдің сөзінше, тиісті заң күшіне енгеннен кейін Президент туыстары лауазымдарын босатады. Мәселен, қазір Тоқаевтың қарындасы – Қарлыға Ізбастинаның күйеуі Теміртай Ізбастин Қазақстанның Болгариядағы төтенше және өкілетті елшісі қызметін атқарып жүр.
Қанат Мусин – ҚР Әділет министрі:
«Президенттің туыстарына лауазымды қызмет атқаруға тыйым салынса, бәрі заң бойынша жасалады. Қызметтен алып тастау деген кеңес кезінен қалған термин. Ол қызметін босатады, себебі заң бойынша бұл қызметті атқара алмайды».
