Кентау тұрғындары соңғы 4 айдан бері қос бірдей мекемеге тазалық үшін төлем жасап келген. Онысын кейін ғана біліпті. Жұрт екі түбіртек жіберіп отырған кәсіпорындардың біріне барса, есіктері тарс жабық тұрған. Мәселені ешкім түсіндірмеген соң, шындық іздеп шырқыраған халық бүгін бас көтерді. Жауаптылар не дейді? Әріптесім Жандос Тастемір тұрғындардың базынасын тыңдап қайтты.
«Квитанция келеді соны аламызда апарып,кассаға төлейміз. Ал мынаны ешкім байқамай жүрген. Қарасаңызшы мынаның аты да жазылмаған. Қайдан келгенін білмей отырмыз», – дейді тұрғындар.
Тұрғындардың түсінбейтіндей бар. Өйткені, «Жан Кентау» мекемесі ай сайынғы төлем қағазын жарық мекемесімен бірге берген. Содан күмән туындапты. Алдыңғы мекеме секілді жеке келісім шартқа отырмаған. Кейін екі бірдей чек келгенде төбеден жай түскендей бопты. Енді көпшілік осының анығын біле алма й отыр.
Бұған дейін қаланың қоқысын «Кентау-Тазалық» мекемесі жинап келген екен. Алайда жұмысы экологиялық талаптарға сай болмай, қызметін тоқтатқан. Шілде айынан бастап, қала тазалығына «Кентау Жан» мекемесі жауапты. Мекеме өкілі бұл туралы арнайы сайттарда жарияладық дейді. Жария түрде келісім шарт түзілгендігін айтады. Түбіртектің жарықпен бірге келуі ешқандай заңға қайшы емес дейді олар.
Әттегенайы сол, алдыңғы компания басшылығы қара халықты 4 ай бойы алдап, түбіртек беріп келген. Тұрғындар мәселесін айтып ол мекемеге барса, есіктері үнемі жабық тұрады екен.
Қуаныш Исқақов, қала әкімінің орынбасары:
«Әкімдік тарапынан тиісті жұмыстар жүргізуде. Тұрғындарға нәтижесі шыққан кезде хабарланады».
Енді, қаладағы тазалық жұмыстарымен «Кентау Жан» мекемесі айналысады. Тұрғындар осы мекемеге төлем жасауы тиіс. Ал, алдыңғы компания алған ақшаларын қайтарумен құзырлы органдар айналысып жатқан көрінеді.
