Түркістан облысы осы қыста көмір тапшылығын тартуы мүмкін. Себебі отынға деген қажеттілік 966 000 тонна болса, қазір оның 47 пайызы, яғни 450 000 тоннасы ғана жеткізілген. Бұл туралы жауапты сала мамандары не дейді? Жалпы, жылыту маусымына дайындық қалай? Алтынбек Әмит баяндайды.
Қалаға көмір жеткізушілердің айтуынша, қар түспей-ақ қазірдің өзінде халық арасында талас туа бастаған. Дегенмен облыстық жылумен қамтамасыз ету бөлімінің басшысы бұл ақпаратты жоққа шығарып, «көмір қоры жеткілікті, ешқандай мәселе туындамайды», – деп отыр.
Марат Байқонысов, облыстық жылумен қамтамасыз ету бөлімінің басшысы:
«Аудан, қала әкімдіктерінің мәліметіне сәйкес, 24 теміржол тұйығы бар. Олардың ешбірінде көмір тапшылығы жоқ. «Шұбаркөлдің» тоннасы 14 мың 500 теңге мен 18 мың 500 теңге аралығында».
Ал, қаладағы орталық жылыту мекемесіне көмірдің керегі жоқ. Себебі қазандықтар екі жылдан бері табиғи газбен жұмыс істейді. Нәтижесінде, қаладағы жылу жүйесінің тарифі төмендейді. Яғни, бұрын әр үй жылытуға шамамен ай сайын 5900 теңге төлесе, қазір бұл сомма 3000 теңгеге, яғни, екі есе арзандаған.
Ерғазы Рысбеков, қалалық «Жылу» МКК директоры:
«Алайда газ келмеген жағдайда бізде қатты отынмен істейтін қазандығымыз дайын тұр. Оған қажетті 20 күндік норматив көміріміз қоймада тұр. Газ да бізде тасымалды емес, табиғи. Құбырмен келіп тұр. Есептегіш құралы арқылы есептеп, соны төлеп береміз»
Жауаптылардың айтуынша, жылыту маусымы 1 қарашада басталмақ. Ал егер оған дейін үш күн қатарынан термометр 8 градустан төмен болса, онда жедел түрде жылу беріледі. Қазір бұл мекемеде 110 қызметкер маусымдық жұмыс істейді.
