Елімізде коронавирустың жаңа штамынан төнген қауіпке байланысты шектеу шаралары күшейтіледі. Яғни «Омикрон» өршіп тұрған Африка елдерінен және Гонконгтан келетін шетел азаматтары елге кіргізілмейді. Және бірқатар елмен әуе қатынасы тоқтатылады. Өйткені коронавирустың жаңа штамының қарқыны сұмдық. Үкімет қандай шараларды қолға алмақ? Шынар Әділханқызы айтып берсін.
Елде эпидахуал жақсарып келе жатыр деп босаңсуға әлі ерте. Себебі 32 рет мутацияланған жаңа штамм тіпті екпе салдырғандар мен коронавирусқа бұрын шалдыққандарға да жұғуы мүмкін деп болжап отыр мамандар. Еліміздің Денсаулық сақтау министрлігі де жұртшылықты барынша сақтануға шақырды. Және желтоқсанның 3-інен бастап шектеу шараларын енгізілмек.
Асқар Мамин, ҚР Премьер министрі:
«Қызыл» аймақта Солтүстік Қазақстан облысы ғана қалып отыр, 5 өңір – «сары» аймақта, 11 – «жасыл» аймақта. Басқа елдерде коронавирустың «Омикрон» деген жаңа штамының пайда болғанын ескере отырып, Мемлекеттік шекарада бақылауды күшейту туралы Денсаулық сақтау министрлігінің ұсынысын қолдаймын».
Оңтүстік Африкада мутацияға ұшыраған «Омикрон» штамы қазірдің өзінде Еуропаның бірқатар еліне таралып үлгерді. Олардың қатарында Испания, Нидерланды, Германия, Ұлыбритания және Бельгия бар. Ал ең атышулы оқиға Португалияда болды. Футболдан Португалия біріншілігінде Белененсеш Бенфикамен кездескен. Сол кезде команданың 27 ойыншысынан коронавирус анықталды. Осылайша, қосалқы құрамның тек 9 ойыншысын алаңға шығарған. Нәтижесінде, Бенфикадан 0-7 есебімен ойсырай жеңілген еді.
Граса Фрейташ, Португалия денсаулық сақтау министрі:
«Коронавирустың жаңа нұсқасының қалай пайда болғанын, шыны керек, түсіне алмай қалдық. Олармен байланыста болған адамдарды да анықтап жатырмыз. Олардан ПТР-тест алуды да жиілетіп жатырмыз. Белененсеш футбол клубының ойыншыларының барлығы вакцина алған болатын. Бұл дегеніміз екпе әзірге омикронға төтеп бере алмай тұр».
Айта кету керек, бұдан былай Ботсвана, Лесото, Мадагаскар, Малави, Эсватини, Оңтүстік Африка елдері мен Израиль, Чехия, Нидерланды, Бельгия, Ұлыбритания мен Италия, Германия азаматтары елімізге келе алмайды. Ал, Аустралия мен Канада, Мысырдан келген туристер вакцинасы салдырса да ПТР талап етілмек. Сондай-ақ Үкімет басшысы да шекарада санитарлық-эпидемиологиялық бақылауды күшейтуді және елдегі жағдайды үнемі бақылауда ұстауды тапсырды.
