Бүгін «Қазақтелеком» ғимараттарында тінту жүріп жатыр. Бұл туралы Сыбайлас жемқорлыққа қарсы іс-қимыл агенттігінің төрағасы Олжас Бектенов айтты. Еске салсақ, «Қазақтелеком» АҚ-ның 24% акциясы Қайрат Сатыбалдыұлына тиесілі. Ал ол қомақты қаржыны жымқырды және қызметтік өкілетін асыра пайдаланды деген күдікпен ұсталып, уақытша ұстау изоляторына қамалған. Айта кетсек, Қайрат Сатыбалдыұлы Қазақстандағы ең ықпалды 50 бизнесмен қатарында. Forbes Kazakhstan журналының есебі бойынша, оның дәулеті 163 миллион долларға бағаланады.
Қайрат Сатыбалды-Елбасы Нұрсұлтан Назарбаевтың немере інісі. Саяси мансабында мемлекеттік қызметкерден ірі кәсіпкерге дейін өскен ол -қаңтар оқиғаларынан кейін қызметінен босатылған ҰҚК басшысының бұрынғы бірінші орынбасары Самат Әбіштің туған ағасы. Бұған дейін оның есімі офшор құжаттарында да әшкереленген болатын. Бір қызығы, «Қазақтелеком» үлескері салық ретінде бюджетке 2019 жылы — 172 мың теңге, 2020 жылы 11 теңге төлеген.
Олжас Бектенов — ҚР Сыбайлас жемқорлыққа қарсы іс-қимыл агенттігінің төрағасы:
«Қазіргі таңда «Қазақтелекомға» байланысты бірнеше іс қозғалды. Яғни АҚ-ның ақшасын жымқыру фактісі бойынша. Осының аясында тергеу амалдары жүргізіліп жатыр. Сома белгіленді, бірқатар эпизод бар. Тиісті сараптамалар жүргізілгеннен кейін соманы атаймыз деп ойлаймын. Бірақ сомалар миллиардтаған екенін айта аламын».
Сондай-ақ Қайрат Сатыбалдыға «Kaspi.kz» АҚ акцияларының 30%-ы тиесілі. Сондықтан аталған банктың ақшасын түгел алып қашпақшы болған деген қауесет тарап жатыр. Алайда компанияның іргесін қалаушы әрі төрағасы Михаил Ломтадзе банк клиенттерін мұндай негізсіз ақпараттарға сенбеуге шақырды.
Михаил Ломтадзе — «Kaspi bank» АҚ басқарма төрағасы:
«Қайрат Сатыбалды 4 жылдан бері ы Kaspi-ге қатысы жоқ. Ол 2015 жылдан 2018 жылға дейін ғана Kaspi акционерлерінің бірі болды».
Сатыбалды Ислам дінін берік ұстанады. 2005 жылға дейін ол жеті рет Меккеге, екі рет қажылыққа барған. 2011 жылдың сәуірінде ол 50 айтыскер, 10-ға жуық ақын-жазушыны кіші қажылыққа жіберген. Әрі өзінің қайырымдылық қоры 17 кесене мен 25 мешіттің құрылысына көмектескенін айтқан. Мәселен Сарыағаш ауданындағы мешіттік құрылысына өз қалтасынан млрдтаған теңге шығарған.
«Антикор» орталық аппаратының қызметкерлері Сатыбалдыны жеке ұшағымен Дубайға ұшпақшы болған кезде қолға түсірді. Бейресми деректерге сүйенсек, ол қызының сол жақта өткен үйлену тойына бармақшы болған. Қазір оның басқа да қылмыстарға қатысы бар-жоғы, соның ішінде мемлекет қауіпсіздігіне нұқсан келтіру ісіне қатысы тексерілуде.
