Түркістан облысында бейнебақылау камералары көбейгелі көлік жүргізушілерінен маза қаша бастаған. Себебі «тапқанымыз айыппұл төлеуден артылмайды», – деп зар еңірейді олар. Айтса айтқандай, полицейлер 8 айдың ішінде осы бейнебақылау арқылы 58 мың құқық бұзушылық анықталғанын мәлімдеді. Әсіресе, заң бұзушылықтардың көбі шетелден әкелінген, еш жерде тіркеуде жоқ темір тұлпарларға тиесілі дейді олар.
Абзал Оразбақовтың көлік тізгіндегенін 20 жылдан асқан. Осы уақыт аралығында ол өзінің бірде бір рет айыппұл төлемедім деп айта алмайтынын кейде заңға бағынбай олқылық жасаған кездері де болғанын жасырмайды. Әйтсе де жүргізуші соңғы жылдары қалада қадам аттаған сайын ұшырасатын камералардың мезі қылғанын айтады.
Абзал Оразбақов, тұрғын:
«Былтыр бір өзім 525 мың теңгеге дейін айыппұл төледім. Не үшін көбейіп кеткенін маған бірде-бір адам түсіндірген жоқ. Сондықтан төлеуден басқа амалым қалмады. Қазір тіпті аялдама сайын камера қойып тастаған. Кейде өзіңіздің қалай жол ережесін бұзғаныңызды байқамай да қаласыз. Тек үйге қағаз келгенде ғана білесіз. Соны азайтуға болмай ма? Бұрын МАИ тоқтатып, «осындай ереже бұздың, сол үшін айыппұл», – деп жазып беретін еді. Қазір ондай жоқ. Қазір тек қана түсіріп алады болды».
Бейнебақылау камераларының көбеюіне өре түрегелушілер көбіне жол ережесімен жүруге дағдыланбаған жүргізушілер дейді сақшылар. Дегенмен, олардың қарсылығы ештеңе шешпейтін секілді. Себебі бүгінде облыс орталығында 56 бейнеқабылау камерасы болса, Полиция департаменті жыл соңына дейін тағы да 800-ін қосу жоспарда бар екенін айтты.
Сейітхан Сейітжомарт, Түркістан облысы штаб басқармасының бастығы:
«Былтыр 41 200 құқық бұзушылық анықталса, биыл олардың саны 58 100 болып отыр. Яғни 17 мың құқық бұзушылық артығымен анықталып отыр. Жол ережесін бұзатындар көбеймесе, азайып жатқан жоқ».
Одан өзге, қырағы көздің арқасында шетелден әкелінген көліктер де анықталуда. Мәселен, жыл басынан бері 1000-нан астам Ресей көлігі тоқтатылып, оның 565-і айыппұл тұрағына қойылған.
