Шымкентте шенеунікті бопсалаған блогер ұсталды

Шымкентте шенеуніктен ақша бопсалаған блогер ұсталды. Ол әкімшілік ғимаратының төбесіндегі жыртылған туды бейнетаспаға түсіріп, оны жариялаймын деп қорқытқан. Сол үшін мекеменің жауапты тұлғасынан 500 мың теңге талап етіпті. Ал бұл сомманы берген жағдайда видеоны таратпауға уәде берген. Қалалық полиция департаментінің мәліметінше, құзырлы органдарға бопсалаудың құрбаны болған шенеуніктің өзі арызданған. Арнайы операция барысында блогер 300 мың теңгені алып жатқан жерінде қолға түсті. Полиция қызметкерлері ақшаны оның «Toyota Сamry» автокөлігінен тәркілеген. Күдікті қазір сот санкциясымен қамауға алынып, тергеу жүріп жатыр.