Ордабасы ауданында биыл желтоқсан айында «Индустриаландыру картасы» аясында екі жоба іске қосылады. Соның бірі – жаңа озық технологиямен жабдықталған «Bokei» қыш зауыты. Жалпы құны 2 млрд 600 млн теңгені құрайтын кәсіпорында жергілікті 60 азамат жұмыспен қамтылады. Аталған қыш зауытының қуаттылығы – тәулігіне 120 000 дана. Бұл туралы брифингте 9 айда атқарылған жұмыстарды қорытындылаған аудан әкімі Бағлан Батыршаев мәлімдеді.
Сондай-ақ, келесі жоба – «Александровский сад» көкөніс сақтау қоймасы. Нысанның жалпы құны 800 млн теңге. Онда 15 адам жұмыспен қамтылады. Аталған қойма аудан шаруаларының өнімін сақтауға ыңғайлы орын болмақ.
«Ағымдағы жылдың 9 айында ауданға 15 млрд 296 млн теңге инвестиция тартылып, 2020 жылдың тиісті кезеңімен салыстырғанда 2 млрд 731 млн теңгеге артты. Сонымен қатар, аудан көлемінде жұмыс істеп тұрған шағын және орта кәсіпкерлік нысандарының саны – 10 954. Оларда 16 669 адам жұмыспен қамтылған. Өндіріс саласында жалпы 39 кәсіпорын жұмыс жүргізуде. Есепті кезеңде аталған кәсіпорындар 1 млрд 599 млн теңгенің өнімін өндіріп, көрсеткіш өткен жылдың тиісті кезеңімен салыстырғанда 353 млн теңгеге артты», – деді Бағлан Дәнебекұлы.
Аудан экономикасының жетекші бағыттарының бірі ауыл шаруашылығы саласы. Ауыл шаруашылығының жалпы өнімінің көлемі 9 айда 50 млрд 372 млн теңгені құрап, өткен жылдың осы кезеңімен салыстырғанда, 14 млрд 381 млн теңгеге ұлғайды.
Түркістан облысының Өңірлік коммуникациялар қызметі
