Осыдан алты жыл бұрын Түлкібас ауданының табиғаты тамаша жерінен құм-тас карьерін ашқан кәсіпкер енді цемент зауытын салып жатыр. Кен орнының шаңына тұншықтық деген жұрт, енді цементтің тозаңына уланамыз, – деп дегбірі қашып отыр. «Қазақстанның Швейцариясы» атанған өлкенің экологиясы не болмақ? Тұрғындар наразылығын Нұрлан Сұлтанбек тыңдап қайтты.
Өткен жылы мұнда химиялық зат шығаратын зауыт бой көтермек болды. Бірақ, жақын маңдағы ауылдар өре түрегелген соң тоқтаған. Енді міне, цемент зауыты салынбақ. Бұл тұмса табиғатты талқандайды. Ең сорақысы тұрғындардың денсаулығын құртады,- дейді ауыл халқы.
Болатбек Құрманов, Түлкібас ауданының тұрғыны:
«Қарсымыз! Өйткені бұл жерде тұратын – біз, қалатын – біз, біздің бала-шағамыз. Ертең біздің ұрпағымыз мүгедек, көзі соқыр, шала туған қабілетсіз болмасына кепіл бар ма? Сейітжанов мырза кепіл бола ма? Болмайды. Зауыт қазір Тассайда тұр. Тассайдың айналасындағылардың бәрі көшіп жатыр. Үйін ешкім алмайды. Шөп өспейді, құр тастан басқа ештеңе жоқ. Енді келіп басқа жер құрып қалғандай, кішкентай табиғатымызды талқандап жатыр»
Халықтың ызынына тиетіні – түрлі техникалардың тынымсыз жұмысы. Түнде ұйқы, күндіз күлкіден айырылған түлкібастықтар зауыт құрылысында жүрген техниканы тоқтатып тастады. «Зауыт түгілі зиянды зат шығаратын цех қондырмаймыз» деген олар кәсіпкер кеңсесінің есігін қақты.
Тұрғындар:
«Хабарластық. Директор біз жиналыстамыз, жоқ, келмейміз» деді. Осы жердің директоры. Аты – Қуаныш.»
Жиналған жұртты тыныштыққа шақырғысы келген аудан әкімі орынбасары «ел түгел қарсы болса, онда зауытты тоқтатуға болады», – дейді
Бауыржан Ахметов, Түлкібас ауданы әкімінің орынбасары:
«Халықтың атынан қазір Қазбетонның қазу жұмыстарын жүргізу бойынша арыз түсіріп жатырмыз. Осы арыз бойынша біз өзі белгілі мекемелерге жолдаймыз. Солардың жауабын алып, елдің алдында сол кісілерге жауап бергізетін боламыз. Тоқтатуға әрекет жасаймыз. Егер халық қарсы болса, бұл жоба жабылады».
Алайда әкім орынбасарының сөзіне келіспейді. 9 айда атқарған есебінде цемент зауытының салынатынын кесіп айтты. Табиғатты барынша ластамай, құрылыс жұмыстары жалғаса береді. Оның да өзіндік тиімді тұстары бар ,- дейді.
Нұрлан Байғұт, Түлкібас ауданының әкімі:
«Өңіріміздің экономикалық даму жағынан үлесі бар. Қанша ма адамды жұмыспен қамтиды. Ал құрылысты барынша аз деңгейде зиян келтіретіндей етіп салу қолға алынды».
Ал арызын арқалап табалдырық тоздырған тұрғындар шенеуніктің сөзіне бұл жолы да сенді. Тіпті тағы да шағым жазып, жиналғандар түгел қол қойып берді. Енді осыдан кейін зауыт құрылысы тоқтап, құм-тас карьері жабылмаса, Батыс Қытай-Батыс Еуропа жолын жауып тастаймыз деп тарқасты.
