Дәлірек айтсақ, «Заң» газетінде бірнеше айдан бері жүріп жатқан Кемел Тоқаев атындағы детектив шығармалар байқауының жүлдесі 24 желтоқсан күні киелі шаһарда табыс етіледі.
Айта кету керек, «Заң» медиа-корпорациясы ЖШС-нің бастамасымен детектив шығармалар бәйгесі осымен төртінші мәрте өткізіліп отыр. Және биыл өте тартысты болып жатқанға ұқсайды. Себебі келіп түскен шығармалар бірінен бірі өтеді дейді ұйымдастырушылар.
Айнұр Сембаева, «Заң» газетінің Бас редакторы:
«Алғашқы жылы, шыны керек, шығармалардың сапасына аздап қарнымыз ашқан еді. Жылда өтіп жатқан соң ба, биыл бізге жолданған әңгімелердің көркемдік тұрғыдан өскенін, авторлардың жанр табиғатын түсініп, оны ашуға деген талпынысын көріп, шырғалаңға толы шытырман дүниелерді оқып, көңіл кәдімгідей марқайып қалды. Додаға қатысам деушілер қатары географиялық та, биографиялық тұрғыдан да көбейген. Биография дейтінім, әдебиет әлемінде танылып қалған қаламгерлермен қатар сот хатшылары, судьялар, тергеушілер, ұстаздар, студенттер мен оқушылар да бар. Барлығы Кемел Тоқаев ағамыз өзінің сүйікті жанры ретінде таңдаған детективке өз үлестерін қосуға талпынды және әрекеттері берекелі болды».
Ескерте кетейік, анау-мынау емес, Бас жүлде – 1 000 000 теңге. Бірінші орын – 500 мың теңге, екінші орын – 250 мың теңге, үшінші орын үш адамға беріледі, әрқайсысы 100 мың теңгеден. Сонда жалпы жүлде қоры – 3 млн. теңге. АЙтпақшы, ынталандыру сыйлығы тағы бар. Сондай-ақ төрт жылда қоржынға 500-ге жуық шығарма жиналған. Ұйымдастырушылар солардың үздігін іріктеп, жинақ шығару туралы ұйғарымға келген.
