Түркістанның индустриалды аймағында орналасқан кәсіпкерлік нысандар шығынға батуда, — деп хабарлайды Turkistan24. Тек темір жол тұйығының болмауынан бір өндіріс орны жылына 15-20 миллион теңге қаржысынан қағылады екен. Одан бөлек, электр энергиясының тарифтері де тым жоғары дейді бизнесмендер. Аталған мәселелер Түркістан қаласы прокуратурасының ұйымдастыруымен өткен жиында талқыланды.
Индустриалды аймақтағы 4,8 га жерде орналасқан мына жиһаз цехында 200 түрлі өнім шығарылады. Қажетті шикізат шетелден алынып, дайын өнім еліміздің түкпір-түкпіріне жеткізіліп, тіпті шет елдерге экспортталады. Дегенмен, кәсіпорын басшысы теміржол желісі іске қосылмауынан жылына 20-30 миллион теңге қаржымыз желге ұшып отыр дейді.
КАМАЛ ЮЛДАШЕВ, КӘСІПКЕР:
— 2015 жылы тек құжат қалпында тапсырылған. Содан бері бұл темір жолмен бір тепловоз, бір вагон да өтпеді. 7 жыл бұрын қалай тапсырылды, солай іске алғысыз болып тұр.
Темір жол тұйығының бүгінгі жай-күйін көрдік. Шпалдары шіріп жатыр. Нысанның құрылысына жауапты мекемеден жағдайдың себебін түсіндіруді сұрадық.
Өндіріс орнындағы күрмеуі тарқамаған жалғыз мәселе бұл емес. Тарифтердің қымбаттығы да кәсіпті кеңейтуге қолбайлау болып отыр екен. Кесірінен аумағы 40 га өндіріс аймағында қазір тек 17 кәсіпорын жұмыс істеп тұр.
Кәсіпкерлік нысандарды аралап, кемшіліктерді өз көздерімен көрген жауапты сала мамандары мәселені жақын арада шешеміз деп отыр. Ол үшін орын орын алған кемшіліктердің тізімі жасалып, қыркүйек айында мәслихат қарауына ұсынылады екен.
Сондай-ақ, индустриалды аймаққа маршрут жүрмегендіктен, мұнда қызметкерлер такси жалдап амалдауға мәжбүр көрінеді.
