Ата заңымызға өзгерістер енгізілмек. Бұл жайында бүгін Мемлекет басшысы Қасым-Жомарт Тоқаев Қазақстан Халқы Ассамблеясының 31 сессиясында мәлімдеді. Ассамблея отырысында бірнеше мәселелер талқыға салынды. Алғашқысы республикалық референдум өткізу болса, екіншісі 1 айдан кейін Ұлттық құрылтай отырысы өтетіні айтылды. Жиын барысында тағы қандай маңызды мәселелер сөз болды?
Қасым-Жомарт Тоқаевтың айтуынша, ата заңның үштен біріне өзгеріс енеді.Ал оны парламент бекіте салмайды. Жалпы халықтық референдум өтіп, әр азамат ел тағдырын шешуге тікелей қатысуға мүмкіндік алады.
Қасым-Жомарт Тоқаев – Қазақстан Республикасының президенті:
«Әзірлеген түзетулердің тарихи маңызы бар. Біз мемлекеттігіміздің даму жолындағы жаңа кезеңге қадам басқалы тұрмыз. Алдағы ауқымды әрі маңызды өзгерістер ел болашағынына айрықша әсер етеді. «Республикалық референдум туралы» конституциялық заң қабылданды, бірақ ол әлі күнге дейін қолданысқа енген жоқ. Содан бері Конституцияға төрт рет түзетулер енгізілді. Бүкілхалықтық дауыс беру арқылы Конституцияны өзгерту халықтың ерік білдіруінің жарқын көрінісі болады деп санаймын».
Айта кетейік, елімізде жалпыхалықтық референдум осыған дейін екі рет өткізілді. Екеуі де 1995 жылы. Оның алғашқысы 95тің сәуірінде Тұңғыш Президент Нұрсұлтан Назарбаевтың өкілеттігін ұзарту. Ал екіншісі тамызда жаңа Конституцияны қолдады.
Бұдан бөлек Мемлекет басшысы әлемдегі геосаяси ахуалға да тоқталды. Қазір елімізге іштен, сырттан төнген қауіп көп. Мұндай жағдайда еліміздің азаматтық бірегейлігін нығайтып, отаншылдық рухын көтеруге баса мән беруіміз керек. Ал бұл тұрғыда ассамблеяға артылар жүк көп.
Қасым-Жомарт Тоқаев – Қазақстан Республикасының президенті:
«Болған және болатын сыртқы қақтығыстар азаматтарымыздың арасында ұлтаралық жанжал тудырып, жікке бөлінуге пайдаланылмауы керек. Оған жол беруге болмайды. Мұндай арандатушылықтар болып жатыр. Оны көріп отырмыз. Бірақ арандатушылар қайда тұрса да, қандай құжаттармен тұлғасын жасырса да, біздің бірлігімізге нұқсан келтіріп, мемлекетіміздің дербес саясат жүргізу құқығын бұза алмайды. Бейбітшілік пен тұтастық – басты құндылығымыз, онсыз болашақ жоқ екенін бәрі есте ұстауы керек».
Жиын барысында Президент Конституцияның 33 бабына өзгерістер енгізуге бастама көтергенін мәлімдеді. Бұл өзгертулерде 1995 жылы таратылған Конституциялық сотты қайта құру; президентке саяси партияларға мүше болуға, ал оның жақындары мен туыстарына саяси және квазимемлекеттік секторда лауазымды қызмет атқаруға тыйым салу; парламент жұмысы мен сайлау жүйесін өзгерту мәселелері қамтылған. Арасында бірінші президентке «тәуелсіз Қазақстанның негізін қалаушы» мәртебесін беру туралы ұсыныс та бар. Дегенмен бұл ұсыныс қоғамда сынға қалып, халық тарапынан қарсылыққа ұшыраған еді.
