«Үйіміз бола тұра, пәтер жалдап тұруға мәжбүрміз». Бұл – Түркістанда құрылысы толық бітпеген «Арман» тұрғын үй кешені тұрғындарының базынасы. Олар қақаған қыста да жылу беруге асықпайтын басшыларға қапалы. Құрылысқа жауаптылардың уәдесінде тұрмай алдап соққаны аздай, қала әкімдігі де жауап беруден жалтарып жүргені олардың ызасын келтірген. Қарашаның қара суығында бүрсең қағып отырған халықпен Алтынбек Әмит тілдесіп қайтты.
Рахия Төлемырзаева 40 жыл бойы тынымсыз жұмыс жасап, маңдай термен тапқан ақшасына қаладан пәтер алған. Алғашында баспаналы болдым деп қуанған ол, тұрғын үйінің сапасыз салынғанын кеш біліпті. Қабырғалары қақырап, жел соқса үйдің іші даладай болады дейді ол.
https://www.youtube.com/watch?v=pmXUxjjZ5d8
Рахия Төлемырзаева, қала тұрғыны:
«Мен 40-жыл бойы мемлекетке қызмет істедім. Енді ғана бейнетімнің зейнетін көремін бе десем, баспананың әлегі әуреге салуда. Әкімдікке хат жазып жүргенімізге жылдан асты. Мүлдем хабар жоқ…».
№11 үйдің қолданысқа берілгеніне екі жылға жуықтаған. Әуелде бір айдың ішінде жылу да, су да беріледі деп тұрғындарға үйіп-төгіп уәде берген шенеуніктер енді қарасын да көрсетпей кеткені түсініксіз.
Әсем Омарова, қала тұрғыны:
«Бұл құрылысқа «Шымкентсрой» ЖШС жауапты. Бізге жарнама жасап сататын кезде асты-үстімізге түсіп бәйек болған. Қазір хабарлассаң, телефондарын да көтермейді…».
Тұрғындардың өміріне бей-жай қарайтын шенділерді облыс әкімі де әбден сынға алған болатын. Өмірзақ Шөкеев жауапты сала басшыларына мәселені айдың аяғына дейін жеткізбей шешуді тапсырған. Алайда, әзірге ешқандай әрекет байқалмайды. Бәрінен көңілі қалған тұрғындар мәселе жақын арада шешілмесе, Мемлекет басышысына хат жазуға тастүйін дайын отыр.
