Түркістан облысындағы 3 мыңға жуық тұрғыны бар Нұртас пен Жалаңтөс ауылының шаруалары тығырыққа тіреліп отыр. Себебі елді мекенге баратын каналдың үстінен жүргізілген жол ағын судың өтуіне бөгет келтіруде. Онсызда құрғақшылықтан титықтап жүрген жұрт, тіршілік нәрінен мүлдем қағылып аралға айналмасақ игі еді деп налиды.
Сырдарияның суынан бастау алатын бұл канал ауылға кірер тұста екіге бөлінеді. Екеуінің де үстінен өтетін жол бірнеше жыл бұрын күрделі жөндеуден өткен. Құрылысты жүргізген мердігер тіршілік көзін бөгемеу үшін арна қалдырған. Алайда онысы тым биік дейді ауыл тұрғындары. Тиісінше су да жолдың екінші бетіне өте алмайды.
Қалыбай Бейсенбайұлы – ауыл тұрғыны:
«Көпірлерлдің барлығын биік қойып жіберген. 2 жылдан бері айтып жатырмыз. Былтыр жабылып жүріп бұрынғы арнаны аштырдық. Оны да жолды орып тастады деп жауып тастауда. Біздің малымыз ішетін су жоқ. Үйге айдап кеп шығарамыз, қайтадан айдап шығамыз».
Ауылға келетін екінші канал суын пайдалану тағы мүмкін емес. Өйткені ол бекітулі тұр. Ашайын десе жолшы мамандар 4,5 милиард теңгеге салынған тас жолды быт-шытын шығарасыңдар деп дес бермейді екен. Онсыз да құмы тұзды ауыл тұрғындары су болмаса Арал апатын бастан кешеміз бе қорқады.
Ауыл тұрғыны:
«Компанияның басшылары бұны жабам дейді. Қалай жабады бұны? Анадан 1 жарым метр бөгет болса. 67 жылы қойылған труба бұл. Бұны олар қоймаған. Мынаның өзі бізге жететін еді. Бізге малымызғы жанымызға керек қой мынау. Біз қайтеміз?».
Тұрғындардың жанайқайын тыңдап ауылға ат басын да бұрмаған мамандар біз келген соң жинала бастады. Олар тығырықтан шығар бір ақ жол бар дейді. Ол – жол астынан өтетін канал бөлігінің асты мен жанын бетондау. Сонда ғана тасжолға да зиян келмейді, ағын су да ауылға жетеді екен.
Мейрамбек Тәжіханов – Облыстық жолаушылар көлігі және автомобиль жолдары басқармасының бас маманы:
«Мына жерде откос жоқ. Ол деген сөз су үңгіп жолды құртып жатыр. Мына жақты бұрын су алған. Су деңгейі 1 жарым метрге көтерілген соң трубаны да көтеріп қойғанбыз. Енді біз айтып жатырмыз. Рұқсат берсе 1 аптаның ішінде суды жауып, бетондап беріміз».
Десе де бұл жұмысқа 1 апта уақыт кетеді екен. Оған дейін ағын суды тоқтап тұрады. Ал тұрғындардың көктемгі жауын шашын суын жинап алып қаламыз дегені арман болып қалатын секілді. Себебі, су көлемі дәл осындай қарқынмен 10 күндей ғана ағатын көрінеді.
