Түркістанда өткен жылы пайдалануға берілген жаңа үйлерге тұрғындар әлі қоныстана алмай жүр. Өйткені қағаз жүзінде қолданысқа берілген баспанада не су, не электр, не жылу желілері жүргізілмеген. Мемлекеттік бағдарламамен алған пәтерлеріне кіре алмай жүрген жұрттың мәселесіне қатысты бүгін қала әкімі жауап берді. Сондай-ақ Нұрбол Тұрашбеков БАҚ беттерінде қызу талқыға мемлекеттік меншіктегі ғимараттар сатылып жатыр деген ақпарат жайында мәлімдеде жасады.
Динара Әлиева — қала тұрғыны:
«Түсінбей қалдық не істерімізді. Пәтерге де төлеп жатырмыз. Мына жақта кредит төлеп жатырмыз. Қаңтар айынан бастап. Екі жаққа ақша төлеп, қиналып кеттік».
Түркістанда жаңдан салынған үйлердің мәселесіне қатысты тұрғындардан шағым көбейді. Тіпті қысы бойы жылусыз отырған жаңа үйлер туралы бірнеше репортаж жасадық. 200-ден астам тұрғын мемлекеттік бағдарламамен алған баспанасына кіре алмай, пәтер жағалап жүргендерін де айтты. Мәселені қала әкімінен сұраған едік. Ол тұрғын үйге қатысты мәселелер осы айдың соңында толық шешіледі деп ойлаймын дейді.
Нұрбол Тұрашбеков – қала әкімі:
«Жеке инвесторлардың есебінен соғылған үйлердің инфрақұрылымы бойынша мәселелер болған. Өзімізде болған. Бұл бағытта жұмыстар қазіргі таңда өз кезең кезеңімен шешілуде. Тұрғын үйге қатысты мәселелер осы айдың соңына дейін толыққанды өз шешімін табады деп ойлаймын».
Түркістан қаласындағы мемлекеттік меншіктегі ғимараттар сатылып жатыр. Атап айтқанда, Сапар орталығы, Шығыс моншасы. Жаңадан салынған нысандарды сатуға облыс әкімі тапсырма беріпті. Дәл осындай мәтіндегі деректер барлық БАҚ беттерінде қызу талқыға түсті. Жергілікті әкімдік ел араында резонанс тудырған бұл дерекке қатысты жауап берді. Олардың айтуынша, ешқандай мекеме сатылмаған. Тек сенімгерлік басқаруға берілген көрінеді.
Нұрбол Тұрашбеков – қала әкімі:
«Енді біздегі қазіргі нақты білетінім Шығыс моншасы, неке сарайы алдағы уақытта визит орталығы сосын Жібек жолы паркіндегі аттаркциондарымыз бар парктерді сенімгерлік басқаруға бердік. Сенімгерлік басқаруға анықтама беріп өтеді».
«Қаладағы ғимараттарды сенімгерлік басқаруға берудің бірнеше себебі бар. Мәселен, Сапар орталығының сапасы кеткен. Орталықтың бұрынғы басшысы ғимарат ішін заңсыз бизнес алаңына айналдырған. Нысанның көркі кетіп, ауласы қоқысқа толған. Сондықтан осындай шешім қабылданған дейді жауаптылар».
