Басыма қапшық кигізіп, аяусыз сабады. Осылай деп 2 ай алдын Саурандық тұрғын Нұрболат Өмірбеков біздің арнаға жүгінген еді. Оны аудандық полицейлер екі қой ұрладың деп әбден азаптаған болатын. Біздің араласуымызбен аудандық полиция іс қозғауға көшкен. Десе де заңнан қорықпаған тәртіп сақшылары басқа да ауыл азаматтарына түрлі азап көрсетіп, тайраңдауларын қоймапты.
Полицейлерге сенбейміз! Осылай деген Түркістан облысы 30 жылдық ауылының тұрғындары аудандық полицейлерден 2 айдан бері азап көріп келеді. Айтуларынша ауылдағы жазықсыз азаматтарды ұстап алып мойындарына ауыр қылмыс ілген.
Нұрболаттың 10 жылға сотталуы мүмкін екенін естіген әйелінің бүгінде жағдайы ауыр. Көз жасы көл болған Таңшолпан күйеуінің еш жазықсыз екенін айтып бармаған жері жоқ. Енді оған бүтін бір ауыл қосылды. Себебі, погондылар басқа да ауыл азаматтарын түрлі қылмыстық іске қатысың бар деп қорлауларын тоқтатпаған. Тіпті, тыныш отырмасаңдар ауылдан көшіріп жібереміз деп қорқытып келген.
Жәбірленуші:
«Мені Кентау қаласының жұмысымнан алып кетті. Ақпанның 8 і еді. Мені мал ұрладың деп қинады. Сен күдіктісің, сен істедің дейді. Мен істеген жоқпын дедім. Құлақ шекемнен ұрып, құлағымды жарып жіберген. Әлі күнге дейін сарысу ағады. Қиналсамда мен істеген жоқпын деп тұрып алдым. Ақырында жаным қиналғанда, аяқ қолымды байлап тастады да басыма пакет кигізіп тұншықтырды».
Бүгінде жазықсыз адамды қинап, кінә таққан Сауран аудандық полицейлердің үстінен іс қозғалуда. Алайда заңнан сескенбеген тәртіп сақшылары жоғарыдағылармен ауыз жаласқандарын, ауыл тұрғындарының қолынан дым келмейтінін айтқан. Онысын азаматтар аудиожазбаға жазып алған.
Өмірхан Байбек – Н. Өмірбековтың әкесі:
«Следовательдың айтқаны жазылып тұр. Мен прокурорлармен келісіп қойдым. Генералдың орынбасарымен де келіскенмін дегені жазылған аудиода. Мен сонда бір баламды аманатқа беруім керек пе?»
Облыстық полиция департаменті мамандары аталған аудиожазбаны айғақ ретінде тіркеп, істің тез бітуіне сеп болады дейді.
Досмұхаммед Әбдіраманов – Облыстық қауіпсіздік басқару басқармасының бастығы:
«Арыздарында азаптау белгілері бар болғандықтан, сотқа дейінгі тергеу жүргізу үшін облыстық прокаратура арқылы Қылмыстық кодекстің187 бабының талаптарына сәйкес іс Сыбайлас жемқорлыққа қатысты іс-қимыл агентігіне жолданды. Енді мына аудиожазбалар қолыма енді түсті. Бұл бойынша да арыз жазып берсе, қаралады»
Тәртіптен безген тәртіп сақшыларының ісі қашан аяқталатыны белгісіз. Зар илеген халық берекелерін алған аудандық полицейлердің қатаң жазалуын ғана сұрайды.
