«Кальмар ойыны» ересектерді қойып, балаларды өлімге итермелеуі бек мүмкін. Бүгінде психологтар осылай дабыл қағуда. Өйткені тіпті бастауыш сынып оқушылары кино бойынша жасалған қатігез ойындарын ойнай бастаған. Сондықтан Білім министрлігінің өзі мәселеге арнайы тоқталды. Жандос Тастемірдің репортажында толығырақ.
«Кальмар» ойыны 9 бөлімнен тұрады. Онда 456 адам 45 миллиард вон үшін 6 түрлі ойында бәске түседі. Барлығы да – қарызға белшесінен батқандар. Қатысушыларға жасыл түс берілсе, межеге қарай ұмтылады. Ал, «Қызыл түс» айтылса, бір орында қатып қалуы керек. Шалт қимылдаса, ойыннан шығады.
Кино эпизодтары – әлеуметтік желілерде де трендте. Қазір бүкіл әлем балалары үзілісте осы ойынды ойнайды.
Қатігездек пен жауыздыққа, қантөгіске толы сериалдың негізгі көрермендерінің арасында мектеп оқушылары да бар. Олар кинодан көргенін істеп, жеңілгендерді соққыға жығуда. Психологтар мұны дер кезінде тоқтатпаса, соңы өкінішке ұласуы мүмкін деп дабыл қағуда.
Әйгерім Молтұрыс, педагог-психолог:
«Сауалнама барысында «Кальмар ойындарын» көріп алған жоғары сынып оқушылары бір біріне кинодағы тапсырмаларды беріп құпия кодпен кездесу орнына шақырғанын байқадық. Сондықтан бұл киноның бұғатталып, көрсетілуіне тыйым салуын қолдаймыз»
Франция, Ұлыбритания мен Испания атышулы фильмді балаларға көрсетуге тыйым салынған. Бізде де оның балаларға кері әсері туралы аз айтылып жатқан жоқ. Министірліктегілер де бүгін осыған қатысты пікір білдірді.
Шолпан Каринова, ҚР Білім және ғылым министрінің бірінші орынбасары:
«Фильм Қазақстанда түсірілмеген. Онда белгілі бір шектеулер бар, яғни, 18 жастан асқан ересектерге арналған. Сондықтан ең алдымен ата-аналар осы фактіге назар аударуы қажет. Әрине, балалар психикасы енді-енді қалыптасып келеді. Сондықтан кез келген ақпаратты үйде ата-аналар, мектепте педагогтар бақылауы керек».
Көпшілікті алаңдатқан мәселеге тыйым салынды. Алайда, оны жастар санасынан өшіре аламыз ба? Мәселе – осында.
