Мемлекетті Нарко-империяға айналдырған. Гондурастың бұрынғы Президенті Хуан Орландо Эрнандес АҚШ-қа экстрадицияланды. Оған ресми айып тағылды. Мемлекет басшысы ретінде тікелей қолдау көрсеткені үшін атышулы мексикалық наркокартельдерден ақша алып отырған.
Хуан Эрнандес АҚШ-қа экстрадицияланды. Оған тағылған басты айып – Мексиканы қанға бөктірген Синалоа наркокартелінің жетекшісі Хоакин «Эль Чапо» Гузманнан пара алып отырған. Осылайша, АҚШ-қа кокайн тасымалдаудың тағы бір жолы ретінде Гондурасты пайдаланған. Одан бөлек, картель басшыларына пана беріп, экстрадициядан қорғап келгені анықталып отыр. Енді АҚШ Бас Прокуроры Меррик Гарланд ресми айып тағу процессін бастады.
Меррик Гарланд – АҚШ Бас прокуроры:
«Хуан Орландо Эрнандес өзі мемлекет басқарған 2014-і жылдан бастап, 2020-ы жылға дейін АҚШ-қа кокайн тасымалдануының негізгі маршруттарын ұсынған. Елдегі коррупциялық схемалар арқылы Гондурас ішінде де, есірткінің таралуына жол ашты. Синалоа картелінен жылда миллиондаған доллар қаражатты пара ретінде алып отырғаны дәлелденді. Ол полиция, қорғаныс министрлігіне және Конгресске өзінің жақтастарын отырғызып, есірткі саудасына ешкім кедергі келтіре алмайтындай жағдай жасады».
Осы істі тергеу барысында АҚШ аумағына 100 тонна есірткі кіргізбек болған алып-сатарлар және ондаған адамның өліміне кінәлі қылмыскерлер ұсталды. Оған дейін Хуан Орландо Эрнандес өзін есірткіге қарсы күрестің алдынғы шебінде жүрген қайраткер деп көрсеткен.
Энн Милгрэм – АҚШ есірткіге қарсы күрес агенттігінің басшысы:
«АҚШ-та есірткі саудасы нағыз 21-і ғасырдың кеселіне айналғаны жасырын емес. Оған кінәлілер Латын Америкасындағы жемкорлықтың былығына батқан шенеуніктер. Себебі, шындап кіріссе, наркокартельдерді санаулы күн ішінде талқандауларына болатын еді. Есесіне есірткі – америкалық қоғамның, жастардың санасын улап қана қоймай, өмірлеріне қауіп төндіріп келеді. Бірақ, соған қатысы бар қылмыскерлердің бірін ұстадық».
Хуан Орландо Эрнандесті Гондурас полициясы ақпан айында қамауға алған. Көп ұзамай оны АҚШ-қа экстрадициялауға келісті. Оның бауыры Тони Эрнандес бұрынғы депутат. Бірақ, Тони Эрнандес АҚШ-қа дәл сол айып бойынша әлдеқайда ерте экстрадицияланған.
