Коронавирус: Әлемде вакцина алу қалай жүруде?

Дүниежүзілік денсаулық сақтау ұйымының Бас директоры Адан Гебреисус адамзат Сovid-19 салдарынан нақты қауіпті кезеңді бастан өткеріп жатқанын айтты. «Коронавирустық инфекцияға қарсы вакцинация ауруға қарсы күресте алға жылжуға көмектесті, дегенмен жеңіс әлі алыс. SARS-CoV-2 инфекциясын әлем бойынша жұқтырудың жалпы саны 200 миллионнан асты, бірақ іс жүзінде бұл көрсеткіш әлдеқайда жоғары. Коронавирустың “дельта” нұсқасы 132 елде табылды», деді. Гебреисус табысы төмен елдерде вакцина жетіспеушілігі қатты сезілетінін, олар екпеге аса мұқтаж екенін атап өтті.
Оңтүстік Кореяда қатаң карантин әзірге болмайды. Ел билігі коронавирус инфекциясы таралуының қарқын алуына байланысты үш күн қатарынан 1,7 мыңнан астам вирусқа шалдығу жағдайларын тіркеуде, қатаң шектеулер тағы екі аптаға созылады. Бұл — сағат 18:00-ден кейін екі адамнан артық топтық жиналуға тыйым салу. Аталған шаралар ең алдымен тамақтану орындарына қатысты. Сарапшылар COVID-19 ауруының өсуін SARS-CoV-2 “дельта” штамының тез таралуымен байланыстырады. Оңтүстік Кореяда пандемия басталғаннан бері 207 406 коронавирус тасымалдаушысы анықталды.
Covid-19 Тұманды Альбионға «шабуыл» жасауда. Ұлыбританияда өткен тәулікте коронавирустық инфекцияның 30 215 жағдайы расталып, 86 адам қайтыс болды. Жалпы алғанда, вирус жұқтырғандар саны 5 982 581-ге жетті, ауру салдарынан көз жұмғандар саны 130 086 адамды құрады. Шілде айында елде бірқатар карантин шектеулері алынып тасталды, нәтижесінде инфекция жұқтыру фактілері көбейе бастады. «Англияның Қоғамдық денсаулық сақтау» ұйымының мәліметтері бойынша ауруханаға жату деректері 85 және одан жоғары жастағы адамдар арасында көптеп байқалады. Ұлыбританиядағы ересек тұрғындардың 88%-дан астамы COVID-19 вакцинасының алғашқы дозасын алды және 73% вакцинацияның толық курсынан өтті.