Түркістан облысына қарасты, Кентау қаласында 600 азаматқа жалдамалы пәтер кілті табысталды. Оның ішінде жетім балаларға, ата-анасының қамқорлығынсыз қалған балаларға – 109 пәтер, көпбалалы отбасыларға – 106 пәтер, халықтың әлеуметтік жағынан әлсіз топтары санаты бойынша – 227 пәтер, мемлекеттік қызметшілерге – 139 пәтер, авариялық жағдайда деп танылатын азаматтарға 4 пәтер қаралған.
Өздері үйлі, көңілдері күйлі боп жатқан тұрғындардың ішінде жергілікті тұрғын Қалампыр Тулеубекова да бар. 2015 жылы көпбалалы отбасылар санаты бойынша үй кезегіне тіркелген. Қала тұрғыны осы уақытқа дейін тұрғын үй кезегін үнемі EGOV электрондық порталы арқылы бақылап отырған. Көпбалалы ана 6 жылға жуық уақыт бойы тұрғын үй кезегін сабыр сақтап, шыдамдылық танытып күткен. Бүгінде жалдамалы баспанаға қол жеткізген отбасының қуанышында шек жоқ.
Қала әкімдігінің баспасөз қызметінің хабарлауынша қазіргі таңда Кентау қаласында 5 қабатты 60 пәтерлі 5 үйдің құрылысы басталған. Оған қоса 10 үйдің құрылысын салуға жобалық-сметалық құжаттамасы әзірленген.
