1 қаңтардан бастап мүгедектерге ай сайын берілетін жәрдемақы 5 пайызға өседі. Бұл – болмашы ғана қосылады деген сөз. Мәжіліс депутаты Ерлан Смайлов ҚР Премьер министрінің орынбасары Ерлан Тоғжановқа депутаттық сауал жолдады. «Азық-түлік бағасы күн санап өсіп жатқанда, 65 мың теңге жырттыққа жамау болмайды», – деді ол. Толығырақ тілші тарқатады.
Еркінбай Шалтан – 1 топ мүгедегі. Жыл сайын жәрдемақыға болар болмас тиын қосылады дейді. Алайда ол дәрі-дәрмек тұрмақ, күнделікті азық-түліктен артылмайды. Мүгедек жандардың үні үкіметке жетпейді, сондықтан болар біздің ақымызды есептеуде нақты шарт жоқ, – деп күйінеді ол.
Еркінбай Шалтан, «Шапағат» қайырымдылық қорының төрағасы
«67 мың теңге дейікші. Ол біздің немізге жетеді? Бір ғана пәтерақымыздың өзі бұдан қымбат. Ендеше, мұны қандай логикаға сүйеніп есептейді екен?»
Бүгін осы мәселені Мәжіліс мінберінде депутат Ерлан Смаилов көтерді.
Ерлан Смайлов, ҚР Парламентінің Мәжіліс депутаты:
«Азық-түлік өнімі, коммуналдық қызмет тарифі бағасының тұрақты өсуі мен жалпы өмір сүру құнының қымбаттауы жағдайында мүгедектігі бар адамдарға жәрдемақы мен зейнетақы көлемінің артуы – аса маңызды мәселе. Еңбек және халықты әлеуметтік қорғау министрлігі мүгедектігі бар адамдардың, бір жасқа дейінгі бала күтіміне байланысты үйінде отырған аналардың, көпбалалы отбасылардың жәрдемақысын, сонымен қатар ең төменгі зейнетақыны ұлғайту мәселесін қарастырып жатқан жоқ».
Түркістан облысында 15 мыңға жуық мүгедек тұрады. Енді бұл азаматтардың жәрдемақысы осыншаға өседі
Графика:
1-топ мүгедегі – 59 872 мың теңгеден 65 мың теңгеге;
2- топ мүгедегі 47 710 – 50 мың 95 теңгеге;
3-топ мүгедегі 32431 – 34 мың 52 теңгеге дейін.
Хадиша Мақұлбаева, облыстық ЕӘҚКҚ департаментінің бөлім басшысы:
«Қазақстан Республикасының кейбір заңнамалық актілеріне азаматтардың жекелеген санаттарын әлеуметтік қорғау мәселелері бойынша өзгерістер мен толықтырулар енгізу туралы» 2021 жылғы 12 қазандағы № 67-VII Заңымен өзгерістер енгізілді. Бірінші топтағы мүгедектерге 65 мың теңге төленеді. Ол жыл сайын өсіп жатыр. Биыл 2021 жылға 65 мың теңге 1-топтағы мүгедектерге төленіп жатыр».
Түйін: Осылайша, Еңбек министрлігі 2022-2024 жж. арналған бюджет жобасында әлеуметтік жәрдемақының барлық түрін 2022 жылғы 1 қаңтардан бастап 5 пайызға арттырмақ. Ал азық-түлік, тұрмыстық заттар, дәрі-дәрмек бағасы күн сайын шарықтап барады. Ендеше 60-70 мың теңге жай бір ғана адамның өзіне бір ай өмір сүруге жетпейтінін айтпаса да түсінікті. Осы тұста халық қалаулылары әлеуметтік аз қамтылған топқа төленетін зейнетақы мен жәрдемақыны итке сүйек тастағандай қылмай, айтарлықтай мөлшерде өсіруді айтудай-ақ айтты. Ендеше мүгедек жандар мұңына келгенде үкімет соқыр мен мылқаудың күйін кеше қалмаса деп тілейік…
