Елімізде электр қуаты тапшы. Энергетика министрлігінің мәліметінше, бұл мәселе әсіресе осы жыл соңында қатты байқалатын көрінеді. Өйткені биыл ток қуатын пайдалану көрсеткіші былтырғымен салыстырғанда 1500 Мвт тан асып кеткен. Осыған байланысты Жамбыл, Қызылорда, Солтүстік Қазақстан, Шығыс қазақстан, Ақмола облыстарында және Шымкент қаласында шектеулер енуде.
Еліміздің бірқатар аймақтарында әсіресе, Түркістан облысында қараша айында бұл мәселе қатты сезіле бастаған. Бұл аз десек, қысқа қарай өңірдің барлық аймағында кезең-кезеңімен жарық сөнуі ықтимал.
Асхат Бердіханов, Түркістан облысының энергетика және тұрғын үй-комуналдық шаруашылық басқармасы басшысының орынбасары:
«Облыста энергия тапшылығы мәселесі қараша айынан басталып отыр. Орташа есеппен жарықты өшіру көлемі 20-30 мегаватты құрап отыр. Қазір Энергетика министрлігімен, атқарушы органдармен осы тапшылықты жою жұмыстары жүргізілуде. Бүгін ғана сала министрінің қатысуымен кеңес өтті. Басқосу нәтижесінде қосымша энергоблок іске қосылатын болды. Ол іске қосылса, облыста тапшы болып отырған 10 мегаватт энергия келе бастайды».
Бүгінде көне шаһарда жарық жиі сөне бастаған. Қарапайым халық қана емес, электр қуаты тапшылығының зардабын кәсіпкерлер де сезінетіні анық. Қазір бұл мәселе ҚР энергетика министрлігінде қарастырылып жатыр. Ал өңірдегі электр проблемасын шешу үшін Жамбыл облысының герациясымен келісім шарт орнатылған.
