Жамбыл облысындағы жарылыстан аман қалған өрт сөндіруші Байбек Сембеков «Студия 7» тілшілеріне сұхбат берді.
-«Оқиға орнына келгенде дереу сол жердегі әскерилердің жанына барып, қоймада не бар екенін сұрадым. Олар аса күшті жарылғыштың жоқ екендігін айтты. Біз дереу жұмысқа кірістік. Мен алдымен су көзін іздей бастадым. Ол жақ, өкінішке орай, сусыз аймақ еді. Біздің көліктерде ары кеткенде 5-8 тонна су бар, оның да жетпейтіні белгілі. Кейіннен барлық көліктер ангарға жақын келсін деген бұйрық түсті. Мен көлікке отырдым, жанымда жүргізуші мен жауынгер бар еді. Біз көлікке отырып, жүруге бұйрық берген кезде жарылыс болды»-деді Байбек Сембеков.
Одан кейінгі жағдайды құтқарушы былай еске алады:
-«Біз мінген көлік аударылып кетті. Дереу артқы орындыққа ауыстық. Ары қарай есімде жоқ. Біреу есіктен, біреуі терезеден шығып жатты. Айқай-шу, жылаған дауыстар. Мен сөйлегім келеді, аузым толған шыны, қан түкірудемін. Сөйлей алмаймын»-деп еске алды ол. -«Бірінші жарылыстан он минут өткен соң екіншісі жарылды. Сол сәтте біреудің «Шабуылға!» деген айқайы естілді. Бәріміз каска киіп, жерде жаттық. Сол жерде біреудің аяғы сынған болатын. Бір-бірімізге көмектесіп, ол жерден шықтық. Бізде ол жерден кетуден басқа амал болмады»
Айта кетейік, Жамбыл ауданындағы жарылыстан 15 адам қаза тапты. Із-түссіз жоғалған бір адамды іздеу жұмыстары жалғасуда.
