Жаңа жыл қарсаңында жалғызбасты әкеге көмек көрсетілді. Қадыр Құлсариев бұған дейін көмекке мұқтаж екенін айтып, біздің арнаға жүгінген еді. Құрылыс алаңында күзетші болып істейтін оның жалақысы мардымсыз. Тапқаны қос ұлының тамағына, киім-кешегіне, не жалдамалы пәтерінің ақысын төлеуге жетпейді. Қарызға батып қамыққан әкені қолдаған кімдер? Назым Қайратқызы жалғайды.
Қадыр Құлсариев, жалғызбасты әке:
«Жұмыста бір мезгіл берілетін ыстық тамақты өзі жемейді. Қос ұлына бөліп береді. Өзі қара су мен қара нанды қанағат етеді. Ал отанасы хабар ошарсыз. Балаларын бірде-бір іздеп келмеген».
Нұрмахан, оқушы:
«Маманы сағынбаймыз. Барғымыз келмейді оған».
Жабырқаған жандардың басты мәселесі — баспана. Одан бөлек құжаттар жағы дұрыс болмай, отбасы әлеуметтік төлемдерден қағылып келген. Мәселенің мән-жайын анықтамақ болып қалалық әкімдікке жол тарттық.
Балалар Саттар Ерубаев атындағы мектеп-интернатта оқиды. Сабақ үлгерімдері жақсы. Әкімдік қызметкерлері жеткіншектерге жаңажылдық сыйлық беріп қуантса, Ғалымжан Сүлейменов атты кәсіпкер тегін тұруға үй берді, Сондай-ақ, табысы жақсы жұмыс та ұсынды.
Ғалымжан Сүлейменов, кәсіпкер:
«Әр қазақ – менің жалғызым». Сондықтан қолымыздан келгенше көмекке мұқтаж жандарға көмектескен жөн. Бұл кісінің жағдайын ести тұра, бейжай қала алмадым. Баспана ұсынып отырмын, қанша тұрамын десе тегін тұра берсін. Жұмысқа да өзім аламын. Жеке спорт клубтарым бар, балала сол жерде спортпен тегін шұғылданса болады».
Ал әлеуметтік қамту бөлімі құжат мәселесін жақын уақытта шешіп беруге уәде етті. Сонымен қатар азық-түлік толы мерекелік себетті тарту етті.
Динара Жіпсібаева Түркістан қаласы әкімдігінің жұмыспен қамту және әлеуметтік бағдарламалар бөлімі басшысының орынбасары:
«АХАЖ бөлімі арқылы барлық құжаттарын ретке келтіріп береміз. Құжаттар дайын болса, қаңтарда бұл отбасы атаулы әлеуметтік көмекті алатын болады».
Мереке қарсаңында үй-жайлы болып, жақсы жұмыс тапқан кейіпкеріміздің болашаққа деген үміті оянғандай.
Қадыр Құлсариев, жалғызбасты әке:
«Түркістан» телеарнасына, қалалық әкімдікке, барша жанашыр, жомарт жандарға бүгінгі көмектері үшін үлкен алғысымды білдіремін».
Бұл отбасының жағдайын біздің телеарна алдағы уақытта да назарда ұстайтын болады.
