Түркістан облысы Сауран ауданына қарасты екі бірдей ауыл тұрғындары шу шығарды. Жайылым жерімізді тартып алды деген Шорнақ және Қосмезгіл ауылының тұрғындары әкімдіктен әділдік сұрайды. Жылдар бойы малын жайып, мамыражай күн кешіп келген ауыл тұрғындарынан маза қашқан. Олардың сөзінше әлдібір бай бағлан 200 гектар жайылым жерді сатып алып, өз кәсібін бастамақ екен.
Саурандық тұрғындар айдың күннің аманында жайылымға жіберген малын осылай шұңқырдан тауып алып жүр. Себебі бұрынғы жайылым жерді қазір ойдым-ойдым қазып, қала берді сыммен қоршап тастаған. Әлдебір бақуытты біреу жайылымға жарап келген 200 гектар жерді сатып алыпты. Тұрғындардың сөзінше мұнда зауыт бой көтермек. Осылайша малдарын жайып келген жайылым біреудің қолына өтіп кеткен.
Жандос Бердалиев — ауыл тұрғыны:
«Ортақ жайылымды қайтарсын. Біз өз ауылымызға мал бағу үшін жем шөп сатып алсақ, жер сатып алсақ онда ол не болды. Ал сырттан келгендер пайдасын көріп жатыр».
Молдаш Бердалиев — ауыл тұрғыны:
«Қосмезгіл ауылы ғана емес Шорнақ бар басқа бар 100 пайыз бәрінде осы мәселе. Жайылымдық жер жоқ. Бұл халықтың басқа шағымы жоқ. Тек Құдайдың қара жерін берсін. Малымызды бағайық»
Тұрғындар жайылым жердің жыры Кентауға қарайтын кезден бері басылмай келеді, дейді. Әкімдік ауылдың жайылымдық 2500 гектар жерін ауданға, 50 гектарын Ораңғайға ауыстырған екен.
Шохан Алиханов – Аудандық ауыл шаруашылық жер қатынастары бөлімінің басшысы:
«Бұл кісілердің айтып жатқаны дұрыс. Бұл бойынша ертең Шорнақ ауылы әкімдігімен жиналыс өткізіп қанша шақырымға дейін мал жайылатынын шешеміз. Соны белгіліп берсе біз жайылымды қайтарамыз».
Осылайша аудандық әкімдік пен жер қатыныстары комитеті жайылымдық жерді қайтарамыз деп уәде етті. Ал тұрғындар мәселе оңынан шешілмейінше малын қорасында ұстауына тура келеді.
