Қазақстан өз азаматтарын Украинадан эвакуациялайды. Бұл туралы Қазақстанның сыртқы істер министрлігі хабарлады. Министрліктің мәліметінше, 517 адам уақытша, 1113 адам тұрақты консулдық есепте тұр. Алайда СІМ бұл сандар әлі де өзгеруі мүмкін екенін атап өтті.
Харьковтағы авиациялық институтта оқып жатқан қазақстандық студенттер жарылыстан қорғану аумақтарына орналастырылды. Олар әзірге елімізге эвакуациялау шараларын күтіп жатыр. Жарылыстар басталған кезде шошынған студенттер жатақханадан қашып, бірден оқу ғимаратына жиналған. Қазір Харьковтегі Қазақстан консулдығында сонда білім алып, болмаса жұмыс істеп жүрген отандастырымыздың толық тізімі жасалып жатыр.
Ал Қазақстанның әуе компанияларына Украинаның үстінен ұшуға тыйым салынды. Еліміздің авиациялық әкімшілігі тұрақты, жүк және чартерлік әуе тасымалдарын орындайтын отандық әуе компанияларына нұсқаулық жіберді. Онда жағдай тұрақталғанға дейін Украина аумағына және оның әуе кеңістігінің үстінен азаматтық әуе кемелеріне ұшуға шектеу қойды. Сондықтан бұл соғыс ошағында жүрген ел азаматтарын алып шығуға кедергі келтіріп отыр.
Мұхтар Тілеуберді – ҚР Сыртқы істер министрі:
«Киевтегі Елшілігіміз қазіргі уақытта толықтай жұмыс істеп тұр. Украинадағы азаматтарымызбен байланысып отырмыз. Оларды эвакуациялау жағдайы туындаған кездегі жолдардың да қарастырылып жатқаны сөзсіз. Қандай да бір әскери іс-қимыл орын алған жағдайда азаматтарымызға шұғыл түрде Киевтегі елшілігімізге хабарласу керек»
Еліміздің Украинадағы төтенше және өкілетті елшісі Дархан Қалетаев отандастарымызды эвакуациялау жолдары туралы айтты. Оның сөзіне қарағанда, Украинаның әуе кеңістігі жабық, сондықтан елшілік басқа жолды қарастырып жатыр екен.
Дархан Қалетаев – Қазақстанның Украинадағы төтенше және өкілетті елшісі:
«Әуежай іздеп жатырмыз. Қай жерге Air Astana’ның ұшағы қонатын мүмкіндік барын анықтау керек. Беларусьпен шекара жабық. Молдоваға автокөлік жолы Одесса арқылы баратындықтан қауіпті. Ол жерлерде соғыс болып жатыр. Ең қауіпсізі Львов қаласы, азаматтарға сол жаққа баруды ұсынып жатырмыз. Ары қарай Польша не Венгрияға шығаруға тырысамыз. Азаматтардың Еуропа елдеріне визасы жоқ, сондықтан қай мемлекет бізге жасыл дәліз бере алатынына байланысты. Әзірге жоспар осындай»
Украинадағы Қазақстан елшілігінің мәліметінше, 2 мыңдай азамат консулдық тіркеуінде тұр. Олар елшілікке Киев қаласы, Ильенко көшесі, 26-үй мекен-жайы бойынша және «жедел желі» телефондары арқылы хабарласа алады:
Жедел-желі телефондары:
+38 (067) 347 04 08 (WhatsApp, Viber),
+38 (044) 483 15 96, +38 (044) 489 18 58.
