Шымкентте пандемия кезінде жұмыс істеген 73 медицина қызметкерлері былтырғы жалақылары мен үстемақыларын әлі күнге дейін ала алмай жүр. Өздеріне тиесілі ақыны даулап бармаған жері қалмаған ақ халаттылар бұл жолы шу шығарды.
Өткен жылдың тамыз және қыркүейк айларында ковидпен ауырғандарды емдегендер әлі күнге дейін тиісті қаржыларын қол жеткізе алмай жүр. Індеттің белең алып тұрған тұсында лицензиясы жоқ жеке клиникаға сырқаттандарды қабылдауға денсаулық сақтау басқарамасының басшысы бұйрық шығарып, жұмыс істеуге рұқсат берген. Ал, енді вирустың беті қайтқан кезде, уәдені үйіп-төккендер басқаша сөйлеп шыға келді дейді.
Ұлзада Жұманова – Медбике:
«Бұйрық бойынша басында 850 мың теңге надбавка төленеді деп айтылған. 10-15 күннен кейін надбавка 420 ға түсті деді. Мейлі халық үшін деп оғанда көндік. Бізге оклад 90-100 мың аралығында болады деді. Оны да мейлі дедік. Бұйрықпен бізді жұмыстан шығарып жіберді. 10 күннің ішінде сіздерге айлықтарыңызды береміз деп уәде берді».
Жеке клиниканың өкілдері де етектері жасқа толып отыр. Себебі жауапты шенеуніктер науқастарды қабылдап жұмыс істей беріңдер, қалғанын қатырамыз деген екен. Салдарынан, емдеу мекемесі қарызға белшеден батып, ақыры соңында жабылып тынған.
Ерболат Мырзақұлов- Клиниканың заңды өкілі:
«Пазылов мырзаның сөзіне сеніп, бұйрығына сеніп, лицензия болмағанын ескетсекте бастай беріңдер деген уәделеріне сеніп, біз жұмыс бастадық. Қазіргі таңда 118 млн қарызымыз мойнымызда тұр».
Ал, осы уақытқа дейін шырылдаған жұртқа мардымды жауап қатпай келген Шымкенттің бас дәрігері бәрін шешемін деп ақталып отыр.
Бақытжан Позилов – Шымкент қалалық денсаулық сақтау басқармасының басшысы:
«Бұл кісілер осы уақытқа дейін адвокат жалдаған болатын. Дәл қазір бірнеше минут бұрын біліп отырмын что адвокат ешқандай жұмыс жасалмағанын. Енді өзім адвокат тауып жұмысты доконца бітірем. Бізді де түсініңздер. Еріккен ашқан жоқпыз. Науқастарды емдеу үшін, өмірін алып қалу үшін істедік біз. Егер мен соны ашпайтын болсам, науқастар өледі. Сот мені басқаша соттап жіберетін еді».
Ал жиналғандар өздері жұмыс істеген жеке клиниканың басшылығынан да, жауапты шенеуніктерден де жуық арада көмек болмайтын болса, тиісті министрлікке арыз жазамыз деп бекініп отыр.
