Гризманн «Атлетикоға» оралды немесе таңғажайып дедлайн

Футболдан Еуропаның жетекші чемпионаттарында трансферлік терезенің соңғы күні, яғни, дедлайнда таңғалдыратын оқиғалар тіркелді. Кәрі құрлықтың алпауыт және ортаңқол клубтары осы күні бар күш-жігерлерін салып, өздері қалаған футболшгылармен келісімшарт жасай білді. Солардың негізгілеріне тоқталайық.
Сөз жоқ, әлем чемпионы Антуан Гризманн – жанкүйерлер үшін айрықша тұлға. Былтыр «Барселона» сапында ел кубогын еншілеген дарабоз өзінің бұрынғы командасына қайта оралды. Ол «Атлетико» сапына қосылды. Былтыр чемпион атанған мадридтіктер биыл да басты жеңімпаз жүлдесінен үміткерлердің бірі болатыны анық. Мессиден бір, Антуаннан бір айырылған каталониялықтар Эмерсон Ройал мен Илайш Морибаны да «жұмыстарынан босатты». Бұл жігіттер «Тоттенхэм» және «Лейпциг» клубтарына ауысты. Тиісінше Люк де Йонг «Севильядан» «Барселонаға» келді.
«Атлетиконың» белді ойыншыларының бірі Сауль Англияның «Челсиіне» ауысса, «Реал» франциялық «Реннің» жас жұлдызы Эдуарду Камавинганы 31 млн. евроға сатып алды. Англияның «Арсеналы» Италтяның «Болоньясынан» Такехиро Томиясуды 18 млн. евроға сатып алса, «Вест Хэм» Ресейдің «ЦСКА» клубынан Никола Влашичті шақырды. Ол трансферге 30 млн. евро жұмсалды. Қысқасы, пандемияға қарамастан Еуропаның бай клубтары мықты ойыншылар үшін қаражатты аяп қалып жатқан жоқ. Әсіресе Англияның командалары қарқынды.
Биыл Еуропа құрлығында халықаралық деңгейде 3 дода өтіп жатыр. Олар – чемпиондар лигасы, Еуропа лигасы және Конференция лигасы. Қазақстан атынан Алматының «Қайраты» Конференция лигасының топтық кезеңінде ойнайды.