Бара-бара ең арзан деген макаронның өзін сирек қолданып қалуымыз бек мүмкін. Себебі бағасы 11%-ға қымбаттап, өндірісі бірден 13%-ға төмендеп кеткен. Әзірге ұн өнімдеріне деген сұраныс жоғары. Бірақ жиі тұтынатын азық-түліктің мұншалықты қымбаттап кетуі халықтың қалтасына кәдімгідей салмақ түсіруде. Бағаның өсуі қашанға дейін жалғаса бермек? Жалпы, тұрақтылық қайта орнай ма? Тілшіміз мән-жайды анықтап көрді.
Ұн өнімдерінің қымбаттуына бірнеше себеп бар. Ең негізгісі – шикізаттың қымбаттауы дейді сарапшылар. Ал елімізде ұнның шикізаты – бидай. Бізде ол жеткілікті болғанымен, біртіндеп оның да өзіндік құны көтеріліп барады. Тұрғындар үнемі қолданатындықтан, қымбаттағаны бірден байқалды.
Макарон өнімдері бір жыл ішінде:
кеспе 12,4%-ке,
спагетти 11,5%-ке,
вермишель 10,9%-ке,
рожки 10,7%-ке қымбаттады.
Аталған өнімнің бағасы әсіресе:
Атырау облысында – 22%-ке,
Қызылорда – 18,4%-ке
Қарағанды облыстарында – 17,5%-ке өсті.
Макарон әлеуметтік маңызы бар тауар болғ
андықтан, бағамен арнайы тұрақтандыру қоры тікелей айналысады. Қазіргі таңда Түркістан облысында 13 әлеуметтік дүкен мен ірі сауда орындарында макарон өнімінің келісін 186 теңгеден сатылуда. Өнім құны одан әрі өспеуі үшін айналым схемасы әзірленіп, жергілікті әкімдікке ұсынылған. Құжатты әкімдік мақұлдаса, бағаның өспеуіне бір жылға кепілдік бар дейді.
Лаура Жанасбаева, «Түркістан» әлеуметтік-кәсіпкерлік корпорациясы» АҚ азық-түлікті тұрақтандыру департаментінің бас менеджері:
«Биыл республика бойынша қуаңшылық белең алды. Сондықтан бидай тапшылығына байланысты ұн бағасының көтерілгені мәлім барлығымызға. Макаронның қымбаттауы да соған тікелей байланысты. Дегенмен қазіргі таңда тұрақтандыру қоры арқылы өнім бағасын тұрақтандыру жүргізіліп жатыр десек болады. Егерде жергілікті бюджеттен қаражат бөлінген жағдайда осы айналым схемасының көлемі де көбейеді. Және де мемлекеттік сатып алу арқылы әлеуметтік маңызы бар тауарлардың бағасын тұрақтандыру жүзеге асырылады»
Түйін: Түркістан тұрақтандыру қоры қоймасында жалпы 61 тонна макарон өнімдері бар. Бұған дейін Қазақстанның астық одағы ұн өнімдері қымбаттайтынын мәлімдеген еді. Өйткені нарықта шикізат құны көтерілген. Оған себеп – биылғы құрғақшылық салдарынан бидай түсімінің аз болуы.
