Бұл – Түркістандағы «Бірлік» шағынауданы. Сырт көзге елді мекен емес, қоқыс полигоны секілді. Және күнделікті тұрмыстық қалдықтардан бөлек, адамдар мұнда өлексеге дейін сүйреп әкеліп тастап кете беретінге ұқсайды. Мәселе кеше-бүгін пайда болса бір сәрі, осылай жалғасып келе жатқанына ширек ғасырға жуықтапты. Құзырлы органдардың бәрі хабардар. Алайда олар мәселені біржақты шеше алмай, тек қоқыс төгушілерге айыппұл салудан әріге бара алмай отыр.
Атшаптырым аумаққа алғашында құрылыс қалдықтары тасталған екен. Кейіннен бәзбіреулер күл-қоқыс төгіп, тіпті ақыр аяғы ит-құс өлекселерін әкеліп тастауды әдетке айналдырыпты. Осының кесірінен бұл маңда тұратын тұрғындар көше тұрмақ, үйдің ауласында еркін тыныстай алмай қалған.
Мұхтар Сапаев, қала тұрғыны:
«Мына жерден адам өте алмайды, мен мына үйде тұрамын. Адам шыдай алмайды, сасып кетеді. Не бар бәрін әкеп тастайды. Көршілер ортадан ақша жинап тазалатамыз. Әкімшілікке айтамыз, «болды» дейді. 5-6 адам келеді, тазалағандай болады. Тегістеп тастаймыз дейді. Бір күн келді сырдырып тастаймыз деп, бірақ әлі ештеңе істеген жоқ».
Тұрғындардың базынасын айтып баспаған табалдырығы, қақпаған есігі қалмапты. Алайда әрекеттері еш нәтижесіз. Жақын маңда ойын алаңшасы болмағандықтан, балалар бал шақтарын күл-қоқыстың арасында өткеріп жүр,- деп қынжылады тұрғындар.
Бахрам Исмаилов, қала тұрғыны:
«Мына жерге негізі айыппұл деген белгі қойған. Бірақ оған қарап жатқан ешкім жоқ. Мал өлексесін тастап кете салады. Жаздың күні мына жерде отыру мүмкін емес. Сасық исі жер-әлемді алып кетеді. Біресе бұзау, біресе ит тастап кетті. Ұстап та алдық, полиция келіп айыппұл салып кетеді. Болды. Тоқтау жоқ».
Қала әкімдігі қызметкерлері де құқықбұзушыларға қолбайлау бола алмай отырғанын мойындайды. Қанша рет қоқыс алып келгендерге айыппұл арқалатып жіберсе де, тәртіпсіздікке тоқтам болмаған.
Ерсейіт Бұхарбаев, қалалық инфрақұрылым және байланыс бөлімінің басшысы:
«Бұл бойынша біз бірнеше мәрте тазалау жұмыстарын жүргізгенбіз. Бетіне топырақ сеуіп, жапқанбыз. Жыл басынан бері 10 шақты адамға айыппұл салынған. Осындай жағдай туындай бергеннен кейін сол жаққа баратын жолдарды трактормен қазып та тастаймыз, көлік жүре алмайтындай етіп. Транспорт келетін жолдардың барлығына бетон қоршаулар орнатамыз. Тазалау жұмыстарын атқарамыз».
Түйін: Ғарыштан түсірілген суреттер Түркістан облысында екіжүзден астам заңсыз қоқыс алаңы бар екенін көрсетіп отыр. Ал облыстық Экология департаменті күл-қоқысты рұқсат етілмеген жерге төккендер 500 мың теңгеге дейін айыппұл төлейтінін айтады.
