Екі миллионнан астам халқы бар Түркістан облысы еліміз бойынша ең қылмысы аз өңір саналады. Бұл – еліміздегі ең үздік көрсеткіш. Яғни, құқықбұзушылық деңгейі 10 мың тұрғынға шаққанда 31-ден келеді деген сөз. Мұнда әсіресе учаскілік полицейлердің үлесі зор. Себебі кез келген оқиға орнына бірінші болып жететін солар. Елімізде «Погонды журналист» республикалық жобасы өтіп жатыр. Соның аясында біздің арнаның тілшісі Назым Қайратқызы бір күнін учаскелік полицейлікке арнап, тіпті жоғалып кеткен 5 жасар баланы табуға атсалысты.
№4 учаскелік полиция пункті. Әкімшілік аумақта 27 200 адам тұрады. «Халық тығыз орналасқандықтан, мұнда түрлі құқық бұзушылықтар жиі болып тұрады», – дейді полиция майоры Марат Жұмабеков. Оның бұл салада жүргеніне 25 жылдан асқан.
Марат ЖҰМАБЕКОВ, №4 учаскелік тірек пунктінің аға учаскелік инспекторы:
«Әкімшілік аумақта 3 вокзал, 7 базар, 1 парк орналасқан. Соның барлығына біз қызмет көрсетеміз. Одан бөлек 72 көпқабатты тұрғынүй орналасқан».
Учаскіге келген мына азаматшаның бас қайғысы – жұбайы. Ішкілікке салынған күйеуі отбасының шырқын бұзған. Тұрмыстық зорлық-зомбылықтан әбден зәразап болған әйелдің арыз-шағымын тыңдадым. Түсінгенім, учаскелік полицей болу тұрғындардың тыныштығын күзету ғана емес, бейтаныс жандардың мұң-зарын тыңдап, жұбата білу екен.
Дәл қазір біз жоғалған баланы іздеу жұмыстарына кетіп бара жатырмыз. Бұл істе бірде-бір минутты да жоғалтуға болмайды.
Ойын баласын іздеп жақын аумақты түгелдей шарлап шықтық. Жолай ұшырасқандарға баланың ерекше белгілерін айтып, көрсе хабар берулерін өтіндік. 1 сағаттық іздеу жұмыстарының нәтижесінде жоғалған баланы таптық. Ол өзінен ересек балаларға еріп, үйінен алысқа ұзап, адасып қалған. Ешқандай дене жарақаты жоқ, тек қатты шошынып қалса керек.
ДИАЛОГ АПАСЫМЕН:
«Мінекей, балаңызды өзіңізге тауып бердік. Енді жоғалтпаңыз. Қазір, білесіз неше түрлі оқиғалар болады. Бала ұрлығы бар, педофилдер тағы бар. Сондықтан да балаға абай болыңыз».
Алғыс арқалап, біз жұмысымызды ары қарай жалғастырдық. Республикалық жедел-профилактикалық іс шараның аясында үй-үйді аралап, тұрғындардың тұрмыстық жағдайларымен таныстық. Түрлі оқыс оқиғалардан аулақ болу үшін түсіндірме жұмыстарын жүргіздік. Бұл – учаскелік полицейлердің күнделікті жұмысының бір парасы ғана.
Бердалы Ахметов, қала тұрғыны:
«Мұндағы учаскелік полицейлердің жұмысы өте жоғары. Өйткені бұл өзі қиындау учаске. Соған қарамастан, жақсы жұмыс істейді. Қандай да бір шақырту болса, дер кезінде келіп, мәселені шешеді».
Полиция қызметкері – халықтың қорғаны. Оның басты қаруы – заң. «Ел тыныштығы мен қауіпсіздігін сақтау» деген жаттанды сөздің артында, қаншама жанашырлық, ұстамдылық, азаматтармен тіл табыса білу, сыпайылық сынды адами биік қасиеттер тұратынын ұқтым.
