Елімізде әрбір үшінші сәби көпбалалы отбасында дүниеге келеді. Бұл — әсіресе соңғы 2 жылда, яғни карантин кезінде байқалып отыр. Ұлттық статистика бюросы мамандарының мәліметінше 2021 жылы 500 мыңға жуық сәби дүние есігін ашқан. Осылайша 2020 жылғы көрсеткіштен асып түсті. 2022 жылды Балалар жылы деп бекер белгінбесе керек, биыл да туу көрсеткіші жоғары.
Карантин кезін қынжыла еске алғанымызбен, дәл осы кезде қазақтар саны бірден өсе бастады. 2 жыл ішінде ортамыз 1 млн жанмен толыққан. Ал соңғы үш айдың өзінде елімізде 100 мың сәби дүние есігін ашыпты. Жыл соңына дейін дәл осы қарқын жалғасса, 2 жылдағы туу көрсеткішін басып озуымыз мүмкін.
Осылайша өңірдің демографиясына өлшеусіз үлес қосқан жандардың бірі Жанар Ерінбетова. Ол 9 бала тапқан, алтын құрсақты ана. Небәрі 37 жаста. Жолдасы екеуі 6 қыз, 3 ұлды тәрбиелеп отыр. Олардың үлкені биыл 11 сыныпты тәмамдаса, кенжесі 3 жаста. Көпбалалы ананың сөзінше ұл -қыздары көп болған сайын біріне-бірі бауырмал болып өседі.
Жанар Ерінбетова – көпбалалы ана:
«9 баланың анасымын. Жылда жылда туып туып 2002 жылы түскен оқуымды 2014 те бітірдім. Енемнің абысыны 15 бала 1 ұл тапқан».
Статистиканы сөйлетсек, еліміз бойынша Түркістан облысы бала босанудан көш бастап тұр. Былтыр өңірде 66 мың сәби дүниеге келген. Ал жыл басынан бері 14 мың бөбек туған. Дәрігерлер облыстағы бала туу көрсеткіші карантин басталмай тұрып -ақ жоғары болған дейді. Оған мынадай дәйектер де келтірді
Ардақ Аязбеков — Облыстық №3 перзентхананың бас дәрігері орынбасары:
«Түркістан облысы бала босану көрсеткіші бойынша Республиканың көшбасшысы. Бұл көрсеткішті соңғы 10 жылдықта ешқандай облыс басып оза алмады. Мысалы облысымызда 65 мың 260 сәби дүниеге келді. Бұл тенденция жылдан жылға жалғасып жатыр. Жыл басынан бері 13 мың бала дүние келді».
2021 жылы туу коэффициенті де жаңа рекорд орнатты: 23,5, яғни 10 мың қазақстандыққа 235 жаңа туған нәрестеден келеді. Бұдан басқа, туудың жиынтық коэффициенті 3,32-ге жетті, яғни бір әйелге орта есеппен 3-баладан келеді. Мұндай рекордтық көрсеткіштер Қазақстанда соңғы екі жылда ғана тіркелген. Бір қызығы 2021 жылы туған нәрестелердің жалпы санының 28%-ы көп балалы отбасыларда дүниеге келді.
