Мұны Денсаулық сақтау министрі мәлімдеді. Шетелде 12 жастан бастап екпе салынып жатыр. Ал бізде отандық ғалымдар оның қауіпсіз екенін растағанда ғана қолға алынады. Осы ретте, тұрғындардың ойы қалай екен? Толығырақ Шынар Әділханқызы тарқатсын.
БЛИЦ-САУАЛНАМА
«Мен қарсымын. Неге олар 5 жастан бастап салады? Керегі жоқ».
«Балаға салдыруға қарсымын. Үлкендердің өзі әрең салдырып жатыр».
«Меніңше, қажеті жоқ. Келешегі алда ғой олардың әлі. Көретін жарықтары көп қой».
Ересектердің өзі екпеге үрке қарайды. Өйткені түсіндіру жұмыстары әлсіз. Ал мамандар вакцинадан еш қауіп жоқ деп отыр.
Парахат САФАРОВА, Түркістан қалалық емханасының иммунологы:
«Жалпылама вакцинация салу балалар ағзасына не үшін қажет? Ауру қаупі төнген жағдайда иммунитет қарсы күресу үшін. Сол үшін тек қана екпе салу арқылы бала болсын, ересек болсын аурудан құтылады».
Биыл шілде айында Денсаулық сақтау министрі 12 жастан асқан балаларды вакциналау науқаны басталатын айтқан. Оларға америкалық Pfizer салынады делінген. Енді Алексей Цой бұл жоспарды орындап болмай, 5 жастан асқан балаларға екпе салынуы мүмкін екенін мәлімдеп отыр.
Алексей ЦОЙ, ҚР Денсаулық сақтау министрі:
«Біз бұл мәселені пысықтап жатырмыз. Төртінші тоқсанда Pfizer вакцинасын жеткізу жоспарланған. Ол вакцинаны бірқатар елдер 12 жастан асқан балаларға қолдануда. Бірақ қазір 5 жастан бастап вакциналау мәселесі талқыланып жатыр. Оған дейін 12 жастан бастап вакциналауды жоспарлап отырмыз. Әрине, біз тек кеңес береміз».
Түйін: Бүгінде Түркістан облысы жасыл аймақта. Десе де, соңғы тәулікте 26 адамнан індеттің белгілері анықталған. Жалпы өңірде пандемия белең алғалы 1 млн 43 мыңға жуық ПТР сынамалары алынды. Министр елімізге келіп жатқан вакцинаның барлығы дерлік сұранысқа ие және жоспар бойынша жүргізіліп жатқанын айтты.
