Қараша айының соңында 12 жасқа толған балаларға коронавирусқа қарсы екпе салына бастайды. Бұл туралы Денсаулық сақтау министрлігінің өкілдері хабарлады. Ол үшін елге арнайы Pfizer компаниясының вакцинасы әкелінеді. Тек медициналық мекемелерде ғана салынатын екпені алу үшін ең алдымен ата-ананың жазбаша рұқсаты керек. Қарсы болса, яғни, бас тартса, оларды ешкім мәжбүрлемейді. Осы ретте жасөспірімдерге екпе салдыруға қатысты ел не дейді? Шынар Әділханқызы зерттеп көрді.
Блиц-сауалнама
«Балаларыма салдырмаймын. Өйткені ол ешқандай тексерістен өтпеген».
«Жоқ. Салдырмаймын».
«Салдырмас едім. Себебі болашағын ойлаймын».
«Жоқ, салдырмаймын. Себебі оның қандай вакцина, жас ағзаға зияны бар ма, жоқ па білмеймін ғой».
Жәмила Момбекова, тұрғын:
«Мен өз басым ана әрі Қазақстан азаматы ретінде бұл вакцинаға қарсымын. Жеке өз басым ешқандай вакцина салдырмаймын. Балаларыма да. Өйткені олардың денсаулығы тек маған ғана керек».
Тұрғындар пікірі міне осындай. Алайда дәрігерлер аталған вакцинаның құрамында ешқандай вирус жоқтығын айтуда. Сондықтан желтоқсан айынан бастап 12 жастан асқан балаларға екпе егілмек. Мамандар, «қатерлі вирус балада жеңіл өтеді, олар тек тасымалдаушы деп қарамау керек», – дейді. Өйткені ағзаға көп мөлшерде вирус түссе, оның зардабы да ауыр болады екен.
Парахат Сафарова, иммунолог:
«Балалардың арасында онкологиялық немесе жұқпалы ауруымен Д есебіне тұратындарға онсызда вакцина салынбайды. Ал негізінде бұл вакцинаның құрамында ешқандай вирус жоқ. Коронавирустық ауруды қоздырмайды. Тек ағзада оған қарсы тұратын иммунитет қалыптастырады».
Біздің ел осылай өре түрегеліп жатқанда, өркениетті елдерде керісінше балаларға вакцина салу жасын төмендетуде. Мәселен, АҚШ-та тіпті 5 және 11 жас аралығындағыларға да Pfizer салуды жоспарлап отыр. Аталған елде бұл вакцина түрі қараша айынан бастап 28 млн балаға қолжетімді болмақ. Ал Чили 6 және 11 жасқа дейінгі балаларға екпе салуды бастап та кетті.
Айта кетейік, қазірдің өзінде әлемде 12 мен 15 жастағы жасөспірімдердің 47 пайызы екпе қабылдап үлгірген.
Сара Эрмосилла, ата-ана:
«Менің ойымша, бұл – қуанарлық жағдай. Өйткені біз әлі де пандемия жағдайында тұрмыз. Мысалы, менің ұлыма бетперде таққызу өте қиын. Үйде ұстап та отыра алмайсың. Ол көп уақытын достарымен өткізеді. Сондықтан дәл осындай сақтық шарасы қажет».
Сіздер оны айтасыздар, Қытайдың кей өңірлерінде тіпті екпе салуды 3 жастан бастап кетті. Бұл мақсатта үш бірдей отандық вакцина шығарылды. Барлығы да тиісті сынақтан өтіп, маусым айында-ақ үкімет пайдалануға рұқсат беріп қойған. Ал 12 жастан асқан оқушыларға екпе шілде айынан бастап салынуда. Қытайда қазір халықтың шамамен 75 пайызы вакцина алған, яғни бұл – 1 миллиард 67 миллион адам деген сөз.
