Ауыл әкімі ағын су құбырларын жекеге сатып жіберген. Қарнақ ауылының шаруалары осылай деп арнамызға шағымданды. Осыдан 35 жыл бұрын тұрғындар асарлатып салынған су жолдары қазір жарамсыз күйде. Көптің мүлкін рұқсатсыз иемденіп, ауылдастарының ашуына тиген әкім — «менің ісім емес» — деп басын ала қашуда.
Зәкір Низапов — жеке шаруа қожалық иесі. Кәсіпкер бір айдан бері егістігі мен бау-бақшасына суара алмай отыр. Ал, сонау 16 шақырымнан ағып келетін су құбырларын, шенді-шекпенділер сатып жіберген. Дәл үйінің жанынан өтетін құбырларды әкімдік қызметкерлері қазып алып жатқанын өз көзімен көрген шаруа, оларды тоқтатпақ болған. Бірақ, тікелей әкімнің тапсырмасымен жүрміз деген олар Зәкірдің сөзін елемеген.
Зәкір низапов — Қарнақ ауылының тұрғыны:
«Одан оперативный группаны шақырдық Кентаудан. Олар келген соң әкімде келіп «мәселені өзім реттеймін» — деді. Сондай-ақ бірінші мамыр күні құбырларды қайта орынына қойып беремін деген еді. Қазір мамырдың аяғы болды, әлі жоқ».
Қазылған құбырлар Кеңес одағының кезінде, нақтырақ айтсақ 1984-1985 жылдары Қарнақ ауылын құрғақшылықтан сақтап қалу үшін салынған. Ауылдағы қалталы азаматтардың көмегімен тартылған бұлақ суын, егістіктен бөлек ауыз су ретінде де пайдаланып келдік,- дейді тұрғындар.
Хасан Гайбуллаев – Қарнақ ауылының тұрғыны:
«Ауыл әкімі істеп жатқан мына тірлік адамдық емес. Бұл қаншама халықтың маңдай терімен, еңбегімен тартылған құбырдың 400 метірін кесіп алып кеткен. Өзіңіз көріп тұрсыз мынау қаншама бау-бақша тұр. Мұның бәрі немен су ішеді? Осы құбырлармен су ішеді».
Ауылдастары «ұры» атап кеткен ауыл әкімін жұмыс орнынан таппадық. Артынан іздеп Кентау қалалық әкімдігіне барсақ, шенеунік қала басшысының жиналысынан шығып келе жатқан екен. Ашынған жұрттың алдына шығуға қорықты ма, әйтеуір әбден әбігерге түсті.
Әкімнің дайындап айтқан жауабына сенсек, қазылған құбырлардан 15 жылдан бері мүлдем су ақпапты. Сондықтан оны Байылдар өзенін суын бұрып алу үшін пайдаланудамыз,- дейді.
Нұртас Еркінұлы – Қарнақ ауылының әкімі:
«Ауылдастардың арасында түсінбеушілік болған. Бұл құбырларды біз басқа мақсатта пайдаландық. Алдағы уақытта мұның бәрін өзім қолға алып шешемін. Қазылып алнған трубалар Байылдыр каналына қойылған».
Әкімін құбырларды апардым деген Байылдыр өзеніне бізде барып көрдік. Бірақ 35 жыл жер астында жатқан темір құбырларды таппадық. Ал, тұрғындар — ағын суымызды қайтару үшін құзырлы органдарға арызданамыз дейді. Енді істің ақ-қарасын қалалық прокуратура мен антикор анықтайтын болады.
