Індет қайта күшіне мінді. Вакцина қабылдап, еркіндікке ерік берген әлем жұрты етек-жеңін қайта жинай бастады. Себебі «Амикрон» атты жаңа штамм шықты. Түркістан облысы да жаңа толқынның алдын алу үшін қызу дайындыққа кірісті.
Бір ғана мысал, Шардара ауданына Файзер вакцинасының алғашқы 180 дозасы жеткізіліп, егу науқаны қарқынды жүргізілуде. Америкалық екпені бүгінде шардаралық 69 бала мен отыздан аса жүкті әйел алып үлгерді. Ал Түркістан қаласында аталған вакцина түрін 1890 адам қабылдаған.
Ауданда 400-ден астам адам короновирус инфекциясын жұқтырған. Дегенмен қазір эпидемиялық ахуал тұрақты. Себебі тұрғындардың 50%-дан астамы ковидке қарсы екпе салдырған. Енді вакцинаны балалар, жүкті және бала емізетін әйелдер қабылдауда. Бұл үшін ауданға Файзер вакцинасының 180 дозасы жеткізілген.
Құралай Көбелекова, Шардара аудандық орталық аурухана бас дəрігерінің орынбасары:
«Бүгінде Файзер вакцинасының 102 дозасы егілді. Оның ішінде 30-ы жүкті әйелдерге, босанғаннан кейінгі 3 ананы, қалғандары балалар. Осы үш күнде вакцина алғандардың ішінде ешқандай контингентте асқынулар тіркелген жоқ».
Аудан бойынша жыл басынан бері 41621 адам вакцина алса, оның 38925-і екпенің екі компонентін де алып үлгерген. Ал қарашаның 22-нен бастап ревакцинация науқаны басталды.
Әбдумəлік Бауыржан, Шардара аудандық орталық аурухана басшысының міндетін атқарушы:
«Айта кетсек кезекті вакцинацияға 34621 «Спутник V», 3700 отандық «KazVak», 1600 Haiat Vaks, 1000 короновак пен 696 синофарм дозасы келді».
Cондай-ақ Түркістан қаласында да ревакцинация науқаны қызу жүруде. Бүгінгі күнге дейін тәуекел тобына жататын 100-ге жуық азамат үшінші екпені алып үлгерген. Алғашқылардың бірі болып қосымша вакцинаны 50-ден астам медицина қызметкері қабылдады.
