Мүгедектерге берілетін құрал-жабдық – құдалықта жүретін костюм-шалбар тәрізді. Сапасы сын көтермейді. Мүмкіндігі шектеулі азаматтардың мұңы бүгін Мәжіліс қабырғасында қозғалды. Халық қалаулылары мәселені сағызша созған сала министрін қыспақтың астына алды. Толығырақ тілші тарқатсын.
«Міне, мемлекеттен берілген коляска. Шиқылдап тұр. Менің салмағым 100 келінің шамасында. Ал, мынау өзім сатып алған. Айырмашылық бар ма, жоқ па?»
Еркінбай Шалтанның мемлекет беретін қоларбадан күдерін үзгелі қашан. Өйткені, әрі кетсе екі айдан соң, тоз-тозы шығып қаусап қалады екен. Ендігісіне қол жеткізу үшін тағы 5 жыл күту керек. Сапасына көңіліңіз толмаса, өзгесіне алмастырып алсаңыз болады әрине. Алайда ол үшін қосымша ақы төлеуіңіз шарт. Мұндай игілікке екінің бірі қол жеткізе алмасы анық.
Еркінбай Шалтан, «Шапағат» қайырымдылық қорының төрағасы:
«Мүмкіндігі шектеулі азаматтардың мәселесі бүгін Мәжіліс қабырғасында қайта көтерілді. Халық қалаулысы Дархан Мыңбай мүгедектердің өмір сапасын жақсартуға бөлінген қаржы еселеніп өссе де, тарқаған түйін көрмегенін айтып налыды. Сала министрі де ақталып бағуға тырысты әрине».
Серік Шәпкенов, Қр Еңбек және халықты әлеуметтік қорғау министрі:
«Курьерлер әкеліп бергеннен кейін сапасыз болып қалған жағдайда қайтару мүгедектігі бар азаматтың өзінің есебінен төленеді деген. Қазір «Қазпочта» барлығымен келістік, қазір өнім берушінің есебінен қайтарылады кері».
Жауапқа көңілі толмаған Мәжіліс төрағасы, министрдің мәселені шешемін деп жарты жыл бұрын уәде бергенін есіне салды.
Нұрлан Нығматулин, ҚР Парламенті Мәжілісінің төрағасы:
«Сіз шешуге уәде бердіңіз, міне жарты жыл өтті. Сіздің хатыңыз келген күннен бастап. Әлі ешқандай өзгерістер жоқ. Комиссия құрдыңыз, порталды жаңарттыңыз. Әрине ол керек нәрсе, бірақ ол мүгедек азаматтарға нәтиже керек. Ол әлі жоқ».
Осы салаға қомақты қаражат бөлінетіндігін ескертіп сөзін түйіндеген мәжіліс төрағасы министрге алдағы үкіметтің есептік отырысына нақты нәтижемен келуді тапсырды.
